मनहरीमा सवारी दुर्घटना हुँदा ३ जनाको मृत्यु

हेटौंडा : मकवानपुरको मनहरीमा सवारी दुर्घटनामा परी ३ जनाको मृत्यु भएको छ। मृत्यु हुनेमा मनहरी–३ हाँडिखोला निवासी २४ वर्षीय राजकुमार प्रजा, ३० वर्षीय वीरमान रुम्बा र मनहरी–४ सालघारी निवासी अन्दाजी २० वर्षीय प्रविण प्रजा रहेको जिल्ला प्रहरी कार्यालय मकवानपुरका प्रहरी नायव उपरीक्षक टेकबहादुर कार्कीले जानकारी दिए। 

गएराति मिलडाँडाबाट हाँडिखोलातर्फ जाँदै गरेको मधेश प्रदेश ०३–००१ त ७१८८ नम्बरको ट्रयाक्टर अनियन्त्रित भई मनहरी–३ कालिदमारमा बेलुकी करिब ९ बजे पल्टिएर दुर्घटना भएको थियो। दुर्घटनामा परी घाइते भएका तीनै जनाको हेटौंडास्थित अस्पतालमा उपचारको क्रममा मृत्यु भएको हो।
 

घाइते भएका मनहरी–३ का २४ वर्षीय अमृत प्रजा र ४५ वर्षीय जोखलाल प्रजाको अहिले चुरेहिल अस्पतालमा उपचार भइरहेको मकवानपुर प्रहरीले जनाएको छ।