विराटनगर : मोरङको कानेपोखरी गाउँपालिका-२ मा टिप्परले ठक्कर दिँदा शुक्रबार राति १ जना मोटरसाइकल चालकको मृत्यु भएको छ।
भित्री सडकखण्डमा दक्षिणबाट उत्तरतर्फ जाँदै गरेको प्रदेश १-०२-००१ ख ८६८४ नम्बरको टिप्परले विपरीत दिशाबाट आउँदै गरेको मे ४ प ६८६५ नम्बरको मोटरसाइकललाई राति ९:४० ठक्कर दिएको हो।
दुर्घटनामा मोटरसाइकल चालक मोरङको रंगेली नगरपालिका-८ का ३५ वर्षीय सुरेश दाहालको मृत्यु भएको मोरङ ट्राफिक प्रमुख प्रहरी निरीक्षक सुनील श्रेष्ठले बताए।
उनका अनुसार गम्भीर घाइते दाहाललाई उपचारका लागि विराटनगरको न्युरो अस्पताल ल्याइएको थियो। अस्पताल ल्याउनासाथ राति १०:२५ बजेतिर चिकित्सकले मृत घोषित गरेको प्रहरीले जनाएको छ।
दुर्घटना लगत्तै टिप्पर र चालक सुनसरीको इटहरी उपमहानगरपालिका-१३ का ३४ वर्षीय फिलाराज सुवेदीलाई प्रहरीले नियन्त्रणमा लिएको छ। टिप्परको तीव्र गतिका कारण दुर्घटना भएको प्रहरीको प्रारम्भिक अनुसन्धानबाट खुलेको छ।
प्रतिक्रिया दिनुहोस !
