विराटनगर :कोसी प्रदेश सरकारबाट जनता समाजवादी पार्टी (जसपा) बाहिरिएको छ । सरकारलाई दिएको समर्थन फिर्ता लिँदै जसपा बाहिरिएको हो । नेकपा (एमाले) नेतृत्वको सरकारमा जसपाकी निर्मला लिम्बू स्वास्थ्य मन्त्री थिइन् ।
जसपाबाट प्रदेशसभामा प्रतिनिधित्व गर्ने उनी एक्लो प्रदेश सांसद (प्रदेशसभा सदस्य) हुन् । गत पुस २५ गते एमाले नेता हिक्मतकुमार कार्की नेतृत्वको सरकारमा लिम्बू सहभागी भएकी थिइन् । तर, जसपाको प्रदेश समिति बैठकको निर्णयसँगै उनको मन्त्री पद गुमेको छ ।
जसपा नेता रकम चेम्जोङले बुधबारको बैठकबाट आफ्ना मन्त्रीलाई फिर्ता बोलाउने र सरकारलाई दिएको समर्थन पनि फिर्ता लिने निर्णय गरिएको जानकारी दिए । सरकारले समस्या मात्रै बल्झाउने काम गरेको र कुनै पनि निकास दिन नसकेपछि प्रदेश सरकारमा बसिरहनुको औचित्य नदेखिएको उनको भनाइ छ । प्रदेशको नामकरणको विषयले पनि समस्या मात्रै ल्याएको चेम्जोङ बताउँछन् ।
प्रदेशसभाको दुईतिहाइभन्दा बढी बहुमतले गत फागुन १७ गते तत्कालीन प्रदेश १ को नाम कोसी राखेको थियो । कोसी नाम खारेज गरी ऐतिहासिक पहिचानका आधारमा प्रदेशको पुनः नामकरण गर्नुपर्ने मागसहित पहिचान पक्षधर आन्दोलित छन् । प्रदेश नामकरणको विरोधमा जारी आन्दोलनलाई जसपाको पनि समर्थन छ ।
नामकरणविरुद्धको आन्दोलन र प्रदर्शनमा जसपाका नेता कार्यकर्ताको पनि उपस्थिति रहने गरेको छ । सरकारमा पनि रहने र सडकमा भएको आन्दोलनलाई पनि साथ दिने दोहोरो चरित्र देखाएको भन्दै जसपाको आलोचना भइरहेको थियो । चौतर्फी आलोचना खेप्दै सरकारमा बसिरहेको जसपा अन्ततः प्रदेश सरकारलाई दिएको समर्थन फिर्ता लिने र आफ्ना मन्त्रीलाई पनि फिर्ता बोलाउने निर्णयमा पुगेको हो ।
सरकारमा सहभागी कुनैपनि राजनीतिक दलले समर्थन फिर्ता लिएमा मुख्यमन्त्रीले ३० दिनभित्रमा संसद (प्रदेशसभा)बाट विश्वासको मत लिनुपर्ने संवैधानिक व्यवस्था छ । विश्वासको मत प्राप्त गर्न नसके सरकार ढल्छ । केन्द्रमा नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जसपालगायतका दलको सत्ता गठबन्धन छ । कोसी प्रदेशको सत्ता पक्षीय गठबन्धन भने केन्द्रको गठबन्धनविपरीत छ ।
जसपा बाहिरिए पनि माओवादीले भने प्रदेश सरकारलाई दिएको समर्थन हालसम्म यथावत राखेको छ । प्रदेश सरकारको नीति तथा कार्यक्रम र बजेट ल्याउने तयारी भइरहेका बेला जसपाले भने सरकार छाडेको हो । कांग्रेसको प्रदेश संसदीय दलले माओवादी र जसपालाई सरकार छाड्न दबाब दिइरहेको थियो । एक साताअघि औपचारिक पत्र पठाएरै सरकार छाड्न उसले आग्रह गरेको हो ।
कोसी प्रदेशको ९३ सदस्यीय प्रदेशसभामा एमालेका ४०, कांग्रेसका २९, माओवादीका १३ (सभामुखसहित), राप्रपाका ६, एकीकृत समाजवादीका ४ र जसपाका १ सांसद छन् । प्रदेशमा सरकार गठनका लागि बहुमत पुर्याउन ४७ सांसद आवश्यक पर्छ ।
तर, प्रदेशमा एमाले र राप्रपाका ४६ सांसद छन् । केन्द्रीय गठबन्धनमा रहेका कांग्रेस,माओवादी, एकीकृत समाजवादी, जसपासँग पनि सभामुखबाहेक ४६ सांसद छन् । माओवादीका बाबुराम गौतम सभामुख छन् । दुवैतर्फ बहुमत नपुग्ने भएपछि प्रदेशमा नयाँ सरकार निर्माण असहज हुने देखिन्छ । नयाँ सरकार गठनको खेल सुरु हुँदा प्रदेश मध्यावधि निर्वाचनतिर धकेलिने सम्भावना रहेको पनि नेताहरूले बताउँदै आएका छन् ।
प्रतिक्रिया दिनुहोस !
