कोसी प्रदेशमा बाढी र पहिरोको कहर : ९ जनाको मृत्यु,२७ बेपत्ता,१६३ परिवार विस्थापित

विराटनगर  : भीषण वर्षापछि आएको  बाढी र पहिरोमा परेर कोसी प्रदेशमा मृत्यु हुनेको संख्या ९ पुगेको छ । २७ जना अझै बेपत्ता छन् । बाढी र पहिरोमा परेर ६ जना घाइते भएका छन् । पहिरोमा फसेका १३ जनाको उद्धार गरिएको छ । 

नेपाली सेनाको टोलीले पाँचथरबाट १२ र ताप्लेजुङबाट १ जनाको उद्धार गरेको हो । उद्दार गरिएकाको व्यवस्थापनका लागि प्रहरी खटाइएको छ ।  बाढी र पहिरोमा परेर हालसम्म ताप्लेजुङ र पाँचथरमा ३/३, संखुवासभामा २ तथा भोजपुरमा १ जनाको मृत्यु भएको हो । मृतकमध्ये ७ जना पुरुष, १ महिला र १ जना बालिका रहेका छन् ।

संखुवासभाको चैनपुर नगरपालिका–१० निगुरेमा सोमबार साँझ १ जना पुरुषको शव फेला परेको थियो । सुपर हेंवा हाइड्रोपावरबाट बेपत्ता भएका पुरुषको शव भेटिएको हो । कम्मरदेखि मनिको भाग मात्रै फेला परेका पुरुषको पहिचान खुल्न बाँकी रहेको प्रहरीले जनाएको छ । संखुवासभामा हालसम्म २ जनाको मृत्यु भइसकेको छ । 

कोसी प्रदेशको आन्तरिक मामिला तथा कानुन मन्त्रालयका अनुसार मृत्यु हुनेमा पाँचथरको फालेलुङ गाउँपालिका–४ की ८ वर्षीया जुना साउदेन, फिदिम नगरपालिका–११ घर भइ माउण्टेन ‘बी’ हाइड्रोमा सेक्युरिटी गार्डको रूपमा कार्यरत २८ वर्षीय हेमराज भनिने संजोग लिम्बू र २५ वर्षीया एलिसा माझी रहेका छन् । त्यस्तै, ताप्लेजुङको सिदिङ्वा गाउँपालिका–६ का ३० वर्षीय गणेश तामाङ, मुखुभन्ज्याङका ६७ वर्षीय केशर राई र ३६ वर्षीय सुरेश राईको पनि मृत्यु भएको छ । भोजपुरको टेम्केमैयुङ गाउँपालिका–८ का ३२ वर्षीय मन्दीप राई र संखुवासभाको पाँचखपन नगरपालिका–९ का २६ वर्षीय सन्तोश राईको मृत्यु भएको मन्त्रालयले जनाएको छ ।

संखुवासभामा आधा शव फेला परेका पुरुषको पहिचान खुलेको छैन।  शव पोस्टमार्टमका लागि जिल्ला अस्पताल खाँदबारी लगिएको छ । 

बाढी र पहिरोमा परेर संखुवासभामा ३, ताप्लेजुङमा २ र पाँचथरमा १ जना घाइते भएका छन् । संखुवासभामा बर्दियाका २५ वर्षीय राजेश श्रेष्ठ, ३५ वर्षीय दीपकराज थारु तथा संखुवासभाकै चैनपुर–७ का २५ वर्षीय राजेश श्रेष्ठ घाइते भएका छन् । ताप्लेजुङमा मैवाखोला गाउँपालिका–२ का ४० वर्षीय भीम तामाङ र ४५ वर्षीय राजकुमार राई तथा पाँचाथरको फालेलुङ–३ की ६७ वर्षीया रनमाया राई घाइते भएका छन् । 
बाढी र पहिरोमा परेर संखुवासभामा २१, पाँचथर र ताप्लेजुङमा ३/३ जना बेपत्ता भएका छन् । बेपत्ताको खोजी जारी राखिएको कोसी प्रदेश प्रहरी प्रमुख डीआईजी राजेशनाथ बास्तोलाले बताए । उनका अनुसार बेपत्ताको खोजी एवं उद्दारमा नेपाली सेना, नेपाल र सशस्त्र प्रहरी परिचालित छ । स्थानीयले पनि खोज एवं उद्धारमा सुरक्षा निकायलाई सहयोग गरिरहेका छन् । 

बाढी र पहिरोमा परेर हालसम्म १ सय ६३ परिवार विस्थापित बनेका छन् । ताप्लेजुङमा ८०, पाँचथरमा ६८ र संखुवासभामा १५ परिवार विस्थापित भएको तथ्यांक मन्त्रालयसँग छ । मन्त्रालयका अनुसार विभिन्न जिल्लामा ४३ वटा घरहरु भत्किएका छन् ।

 संखुवासभामा २४, पाँचथरमा १०, ताप्लेजुङमा ६ र इलाममा ३ वटा घर भत्किएर क्षति भएको हो । बाढी एवं पहिरोका कारण विभिन्न ४ वटामा जिल्लाका १६ वटा सडक अवरुद्ध बनेका छन् । पाँचथरमा ६, ताप्लेजुङमा ४, इलाम र संखुवासभामा ३÷३ वटा सडक अवरुद्ध बनेका हुन् । 

विभिन्न जिल्लामा २३ वटा पुलमा क्षति पुगेको छ । पाँचाथरमा १५, संखुवासभामा ६ र ताप्लेजुङमा २ वटा पुल क्षतिग्रस्त बनेको मन्त्रालयको विवरणमा उल्लेख छ । त्यस्तै विभिन्न जिल्लामा रहेका १३ वटा हाइड्रोपावरमा क्षति पुगेको छ । संखुवासभामा ८, पाँचथरमा ३ र ताप्लेजुङमा २ वटा हाइड्रोमा क्षति पुगेको हो ।