राजविराज : सप्तरीको राजविराजमा जारी सप्तरी प्रिमियर लिग अन्तर्गत पाँचौ दिन बिहीबार सम्पन्न पहिलो खेलमा बजाज खडक वारियर्सले बलान बिहुल सुपर किंग्सलाई १ विकेटले पराजित गरेको छ। खडक वारियर्सले खेलेको तीन खेलमा यो लगातार तेस्रो जित हो।
पब्लिक विन्देश्वरी माध्यमिक विद्यालयको खेलमैदानमा सम्पन्न खेलमा बलान बिहुलले दिएको १४४ रनको लक्ष्य खडक वारियर्सले २ बल बाँकी छँदा ९ विकेट गुमाएर पुरा गर्यो।
बजाज खडक वारियर्सको तर्फबाट तेस्रो नम्बरमा ब्याटिंग गरेका सन्दिप रजालीले सर्वाधिक ८१ रन बनाए। प्लेयर अफ द म्याच घोषित उनले ४३ बलमा ७ चौका र ६ छक्का प्रहार गरे। साहिल पटेल र अनिल यादवले समान १२ रन बनाए। दशौँ विकेटका लागि अनिल यादव र गोमानन्द अमात्य बीच २१ रनको अविजित साझेदारी हुँदा बलान बिहुल जितबाट बन्चित रह्यो।
बलान बिहुलको बलिंगमा रोबिन सिंहले ३ तथा रुपेश सिंह र बसिर अहमदले २÷२ विकेट लिएता पनि जित्न पर्याप्त रहेन।
यसअघि टस हारेर ब्याटिंग गरेको बलान बिहुलले निर्धारित २० ओभरमा ९ विकेटको क्षतिमा १४३ रन बनाएको थियो। जसमा विशाल यादवले २४, कप्तान पवन सर्राफले २२, रोबिन सिंहले १५ तथा हसिम अन्सारीले १४ रन बनाए। खडक वारियर्सका बलर बिबेक यादवले ३ तथा अनिल खरेल र गोमानन्द अमात्यले १/१ विकेट लिए।
तीनवटै खेलमा लगातार जितपछि बजाज खडक वारियर्स ६ अंकसहित अंक तालिकाको शिर्षस्थानमा कायम छ। तेस्रो खेलमा दोस्रो हार पछि २ अंक रहेको बलान बिहुल पाँचौ स्थानमा छ।
प्रतिक्रिया दिनुहोस !
