सहचालकको मृत्यु प्रकरण : दोषीमाथि कारबाहीको माग गर्दै दोलखा सिँगटी सडकखण्ड अवरुद्ध

दोलखा : मृत भेटिएका बा २ ख ८३९ नम्बरका बसका सहचालक  ४५ वर्षीय नारायणबहादुर खत्रीका आफन्तहरूले दोलखा– सिंगटी सडक अवरुद्ध पारेका छन् ।  दोषीमाथि कारबाहीको माग गर्दै मृतकका आफन्तले आज दोलखा– सिंगटी सडक अवरुद्ध पारेका छन् ।

गौरीशंकर गाउँपालिका–३ महताराका ४५ वर्षीय खत्रीका परिवारले उचित क्षतिपूर्ति पाउनुपर्ने र दोषिमाथि कारबाही हुनुपर्ने माग गर्दै बञ्चरेमा नाराबाजी गरिरहेका छन् । खत्रीको टाउको र शरीरका विभिन्न भागमा चोटपटक लागेको अवस्थामा केही दिनअघि शव फेला परेपछि उनका आफन्तजनले घटना शंकास्पद रहेको भन्दै दोषिमाथि कारबाही माग गरेका हुन् ।

यसअघि असार १५ गते पनि दिनभर मृतकका आफन्तजनले दोलखा–सिंगटी सडकखण्ड अवरुद्ध पारेका थिए । प्रहरीले घटना लगत्तै बसका तीनजना कर्मचारीलाई नियन्त्रणमा लिएको छ । उनीहरू हाल जिल्ला प्रहरी कार्यालय दोलखाको नियन्त्रणमा रहेको दोलखाका प्रहरी प्रवक्ता,प्रहरी निरीक्षक राजेश सिग्देलले जानकारी दिए ।

 उनका अनुसार खत्रीको शव अझै आफन्तजनले बुझेका छैनन् । उनको शव दुई दिनदेखि पशुपति चौंलागाई स्मृति अस्पतालको शव गृहमा राखिएको छ । सडक अवरुद्ध भएपछि सिंगटीबाट चरिकोट आउने र चरिकोटबाट सिंगटीतर्फ जाने सवारीका साधन बीच बाटोमै रोकिएका छन्  ।