विराटनगर : लागुऔषध गाँजा मुद्दामा अनुसन्धानका लागि मोरङको लेटाङबाट ४ जनालाई प्रहरीले पक्राउ गरेको छ । लेटाङ नगरपालिका–९ सिरिजंगा चोकका २२ वर्षीय झुप्पे भनिने बसन्त मगर, २१ वर्षीय संयोग बुर्जा मगर, २० वर्षीय आशुतोष मगर र १९ वर्षीय प्रयास राईलाई पक्राउ गरिएको मोरङ प्रहरीका प्रवक्ता डीएसपी रन्जनकुमार दाहालले जानकारी दिए ।
अस्थायी प्रहरी चौकी जाँतेबाट प्रहरी सहायक निरीक्षक (असइ) रामकुमार कटुवालको नेतृत्वमा खटिएको टोलीले उनीहरुलाई बिहीबार साँझ पक्राउ गरेको हो । चारैजनाविरुद्ध जिल्ला अदालत मोरङबाट बुधबार पक्राउ पूर्जी जारी भएको थियो । उनीहरुविरुद्ध शुक्रबार म्याद थप गरेर अनुसन्धानको बाँकी प्रक्रिया अघि बढाइएको डीएसपी दाहालले बताए ।
प्रहरीले असार २० गते लेटाङ–९ का २० वर्षीय दिवाहाङ राई र पवन बाग्दासलाई पक्राउ गरेको थियो । इलाका प्रहरी कार्यालय लेटाङका इन्सपेक्टर विकाश थपलिया नेतृत्वको टोलीले छापा हान्दा उनीहरुको घरबाट लागूऔषध गाँजा आधा किलोसहित प्रतिबन्धित औषधिहरु स्पासपेन २ सय र ट्रामाडोल २ सय ट्याब्लेट बरामद भएको थियो ।
अनुसन्धानबाट राई र बाग्दाससँगै गाँजाको अवैध धन्दामा संलग्न रहेको पाइएपछि बिहीबार साँझ थप ४ जनालाई पक्राउ गरिएको डीएसपी दाहालले बताए । प्रहरीले असार २० गते नै गाँजा र प्रतिबन्धित औषधिसहित लेटाङ–८ का २० वर्षीय सुवास कार्की र २५ वर्षीय लोकेश राईलाई पनि पक्राउ गरेको थियो । घरबाट स्पासपेन ५ सय ५३ र ट्रामाडोल ४ सय ४५ ट्याब्लेट बरामद भएपछि लेटाङ–९ का २६ वर्षीय अभिषेक दर्जी पनि पक्राउ परेका थिए ।
जबरजस्ती करणी एवं बालबिज्याइँका अभियुक्त पक्राउ
लेटाङबाटै प्रहरीले जबरजस्ती करणी एवं बालबिज्याइँका अर्का अभियुक्तलाई पनि पक्राउ गरेको छ । जबरजस्ती करणी एवं बालबिज्याइँ मुद्दामा दोषी ठहर भएका १५ वर्षीय किशोरलाई पक्राउ गरिएको प्रहरीले जनाएको छ ।
पक्राउ परेका किशोरलाई अदालतले १ महिना ६ दिन कैद सजायको फैसला गरेको छ । पक्राउ गरेर प्रहरीले बुझाएपछि उनलाई अदालतले शुक्रबार कैद सजाय भुक्तानका लागि बालसुधार गृह पठाएको छ ।
प्रतिक्रिया दिनुहोस !
