लम्पी स्किनले कर्णालीमा मरे साढे ६ हजार पशु, २ लाख १७ हजार संक्रमित
रोग नियन्त्रणका लागि २ करोड बजेट विनियोजन
साउन ५, २०८० शुक्रबार १३:२५:१६
सुर्खेत : कर्णालीमा पशुमा लाग्ने लम्पी स्किन रोग नियन्त्रणमा चुनौती देखिएको छ। पशुमा संक्रमण फैलिएका कारण दूध उत्पादन घटेको छ भने खेतीको समयमा किसानलाई जोत्न समस्या भएको हो । संक्रमणका कारण गाईगोरु मर्न थालेपछि किसानहरु चिन्तित बनेका छन् ।
यो रोगको संक्रमण मुख्यगरी गाई, गोरु, भैंसी र चौंरीमा देखिएको छ । रोगका कारण पशुहरु धमाधम मर्न थालेका छन् । संक्रमण तीव्र बनेका कारण यसको रोकथामका लागि सुरु भएको खोप अभियान नै प्रभावित बनेको छ । संक्रमित क्षेत्रमा खोप अभियान संचालन गर्न नमिल्ने भएकाले पनि महामारीको रुपमा रोग फैलिएको भूमी व्यवस्था, कृषि तथा सहकारी मन्त्रालयले जनाएको छ ।
मन्त्रालयका अनुसार गत असार ३१ गतेसम्म कर्णालीमा लम्पी स्किन रोगको सङ्क्रमणबाट ६ हजार ७४१ वटा पशु मरेका छन् । हालसम्म प्रदेशका १० वटै जिल्लामा गरी २ लाख १७ हजार १४३ वटा पशुमा लम्पी स्किन रोगको सङ्क्रमण भएको छ । चौँरी, भैँसी, गोरु, गाई र बाच्छाबाच्छीमा संक्रमण देखिएको छ । संक्रमित मध्ये १ लाख ३७ हजार ९४ पशुको उपचार गरिएको मन्त्रालयका पशुविकास अधिकृत प्रचण्ड खड्काले जानकारी दिए । उनकाअनुसार संक्रमणबाट जाजरकोटमा २ हजार ७७२, हुम्लामा १ हजार ६८३, सुर्खेतमा १ हजार ३०, सल्यानमा १ हजार २०, दैलेखमा ५१२, कालिकोटमा ७८५, डोल्पामा ७३४, रुकुमपश्चिममा ४९६ र मुगुमा १२१ वटा पशु मरेका छन् । जुम्लाको तथ्याकं भने मन्त्रालयमा प्राप्त नभएको उनको भनाइ छ ।
संक्रमणका कारण डोल्पामा १४ वटा चौंरी मरेका छन् । गोरुमा रोगको प्रकोप बढी देखिएका कारण किसानलाई बर्खेखेती लगाउन समस्या भएकोमन्त्रालयले जनाएको छ । ‘संक्रमण नभएको जिल्ला छैन, सबै जिल्लामा महामारीको रुपमा फैलिएको छ’ मन्त्रालयका पशुविकास अधिकृत खड्काले भने,‘संक्रमण फैलिएपछि उपचारका लागि खोप लगाउन नमिल्ने रहेछ, यसकारण पनि खोप अभियान प्रभावित भएको छ ।’ उनका अनुसार हालसम्म प्रदेशभर १२ हजार ४४३ डोज खोप लगाएको छ । संक्रमण फैलिएको क्षेत्रमा लगाउन नमिल्ने भएकाले खोप स्टक रहेको उनको भनाइ छ ।
संक्रमण फैलिन नदिन पशुको आवतजावत रोक्ने एकमात्र विकल्प रहेको मन्त्रालयको भनाइ छ । महामारी नियन्त्रणका लागि नयाँ आर्थिक वर्षमा प्रदेशभरका लागि २ करोड बजेट विनियोजन गरिएको खड्काले जानकारी दिए । सबै जिल्लामा रोग नियन्त्रणका लागि खोप पुगेको भन्दै उनले संक्रमित पशुलाई लगाउँदा समस्या हुने भएकाले खोप अभियान प्रभावित भएको बताए । यद्यपी प्रदेश सरकार यो महामारी नियन्त्रणका लागि गम्भर भएको उनको भनाइ छ । तर संघ र प्रदेश सरकार रोग नियन्त्रणमा गम्भिर नभएको गुनासो स्थानीय सरकारको छ । स्थानीय सरकारले यो महामारी नियन्त्रणमा औषधिले पनि काम नगर्दा समस्या भइरहेको बताइरहेका छन् ।
प्रतिक्रिया दिनुहोस !
