२०५५ सालमा नेपाली कांग्रेस र नेकपा एमालेको संयुक्त सरकार बन्यो । त्यो बेला एमाले नेता भीम रावल पर्यटन तथा नागरिक उड्डयन राज्य मन्त्री थिए । उनले बीकेमान सिंहलाई नेपाल वायुसेवा निगमको कार्यकारी अध्यक्ष बनाए । त्यसपछि बिनाटेन्डर चाइना साउथवेस्ट एअरलाइन्ससँग सम्झौता गरियो ।
नेपाल वायुसेवा निगमले चाइना साउथ वेस्ट विमान कम्पनीसँग तीन महिनाका लागि जहाज भाडामा लिँदा अनियमितता भयो भनी प्रश्न उठ्यो । जाँचबुझ गर्न पूर्वसचिव भोजराज पोखरेलको नेतृत्वमा आयोग बन्यो । त्यसलगत्तै संसद्को सार्वजनिक लेखा समितिले चाइना साउथ वेस्ट जहाज भाडामा लिँदा अनियमितता भएको भनेर प्रतिवेदन दियो । यो प्रकरणमा वायुुसेवा निगमले २२ करोड रुपैयाँको नोक्सानी व्यहोरेको देखियो ।
त्यसबेला एमालेले ‘लेखा समितिको निर्णयबाट एमाले पार्टी आश्चर्यचकित भएको’ प्रतिक्रिया दिएको थियो । लेखा समिति सभापति थिए, सुवास नेम्बाङ । भीम रावल पर्यटन राज्यमन्त्री थिए । प्रधानमन्त्री थिए, तत्कालीन कांग्रेसका सभापति गिरिजाप्रसाद कोइराला । कोइरालाको नेतृत्व त्यो बेला कांग्रेस एमालेको संयुक्त सरकार बनेको थियो ।
‘चुनावी सरकारमा रहेका रावलले एक वर्षका निम्ति साउथ वेस्टसँग जहाज भाडामा लिँदा आर्थिक अनियमितता, बदनियतपूर्ण निर्णय र निगमको हितविपरीत सम्झौता गरेका छन् र उनीमाथि हदैसम्मको कारबाहीका निम्ति समिति सिफारिस गर्दछ’ लेखा समितिको निर्णयमा भनिएको थियो ।
त्यसबेला प्रतिउडान घण्टा ३०० अमेरिकी डलर कमिसनबापत लिएको एउटा पत्रसमेत सार्वजनिक भएको थियो । नेपाली राजनीतिमा यो काण्ड निकै चर्चित रह्यो ।
प्रतिक्रिया दिनुहोस !
