धुलिखेल ग्रामीण भेगमा लग्जरी होटल स्थापना गर्ने योजना कसरी आयो ?
सन् २०१५ ओमस्टोन एसिया क्यापिटल स्थापना भएयता हामी लग्जरी होटल निर्माण गर्ने उपयुक्त स्थानको खोजीमा थियौं । यसका लागि पोखरा, ललितपुर तथा काठमाडौंको ग्रामीण भेग चाहार्यौं । तर, काभ्रेमा आउने संयोग जुर्यो । लगानीकर्ता दुवै परिवारलाई यहाँको प्राकृतिक सुन्दरता, ग्रामीण परिवेश साह्रै मन पर्यो । र, यही ठाउँमा होटलको संरचना बनाउने तय गर्यौं ।
तर, भौतिक पूर्वाधार पर्याप्त विकास भएको थिएन । एक किलोमिटर बाटो बनायौं । विद्युत्को डेडिकेटेड लाइन तान्यौं । यस्तो ठाउँमा पूर्वाधार निर्माण लागत उच्च भएकाले हाइ इन्ड टुरिज्म विकास गर्न चुनौती पूर्ण रहेछ ।
होटल निर्माणमा कति लगानी भयो ?
होटलमा हमाल र मोर परिवारको लगानी छ । दुसित इन्टरनेसनलले व्यवस्थापन हेर्छ । होटलले कस्तो सेवा दिन्छ भन्ने दुसितमा निर्भर हुन्छ । दुसित सञ्चालन साझेदार हो । निर्माण कार्यमा साढे दुई अर्ब रुपैयाँ खर्च भएको छ ।
आफ्नै ब्रान्डमा सञ्चालन गर्ने विकल्प हुँदाहुँदै दुसित नै किन रोज्नुभयो ?
संसारमा धेरै विश्वविख्यात होटल ब्रान्ड र चेन छन् । तर, नेपाली परिवेशसँग सुहाउँदो र संस्कृतिसँग मिल्दोजुल्दो सुविधा पस्कने दुसित थानी प्राथमिकतामा थियो । भाग्यवश हाम्रो प्रस्ताव उहाँहरूले स्वीकार्नुभयो । दुसित थानीसँग २० वर्षको समझदारी गरेका छौं ।
प्रतिफल पाउन कति समय लाग्छ ?
प्रतिफल पाउन कम्तीमा १० वर्ष लाग्न सक्छ । र, संयम भयौं भने त्यसपछि दिगो नाफा हुन्छ ।
कस्तो होटल बनाउनु भएको छ ?
हामीले पर्यावरणमैत्री होटल बनाएका छौं । पर्यावरणको संरक्षण गरेर निर्माणकार्य गरेका छौं । दुई तल्लाभन्दा अग्ला भिल्ला बनाएका छैनौं । गुणस्तरीय वायुको महसुस तथा सुन्दर प्राकृतिक छटाको अवलोकन गर्न सकिन्छ ।
सन् २०१६ मा होटलका लागि जग्गा किन्यौं र डिजाइन सुरु भयो । सन् २०१७ मा म्यानेजमेन्ट सम्झौता गरेपछि २०१८ मा निर्माण कार्य सुरु गर्यौं । होटल ६३ रोपनीमा फैलिएको छ ।
यो पनि पढ्नुहोस
प्रतिक्रिया दिनुहोस !
