सत्तापक्ष र प्रतिपक्षबीच सहमति नजुटेपछि बागमती प्रदेशसभाको बैठक बस्न सकेन
भदौ १८, २०८० सोमबार २१:३१:५५
हेटौंडा : सत्तारुढ दल र प्रतिपक्ष दलबीच सहमति जुट्न नसकेपछि बागमती प्रदेश सभाको आज दिउँसो १ बजेका लागि आह्वान गरिएको बैठक सुरु नै नभई स्थगित भएको छ।
प्रदेश सभाको बैठक बस्नुअघि कार्यपरामर्श समितिको बैठकमा सत्ता पक्ष र प्रतिपक्ष दलबीच असार दोस्रो हप्ता भएको बजेट बाँडफाँडको सहमतिको विषयलाई लिएर विवाद भएपछि आजको प्रदेश सभा बैठक स्थगित भएको हो।
प्रतिपक्षी दल नेकपा एमाले र राप्रपाले चालु आर्थिक वर्ष २०८०/०८१ का लागि विनियोजित बजेटमा आफूहरूको माग सम्बोधन नगरी एकलौटी ढंगबाट सरकार अघि बढेको भन्दै असन्तुष्टि जनाएका थिए।
बिहान साँढे ११ बजेदेखि साँझ ६ बजेसम्म पनि सत्तारुढ दल र प्रमुख प्रतिपक्षी दलबीच सहमति जुट्न नसकेपछि बैठक भदौ २० गते दिउँसो १ बजे बस्ने गरी स्थगित भएको हो।
प्रतिक्रिया दिनुहोस !
