बागमती प्रदेश सभा : सरकारी कामकाजको भाषा सम्बन्धी विधेयकमाथि छलफल

हेटौंडा : बागमती प्रदेशमा सरकारी कामकाजको भाषा सम्बन्धमा व्यवस्था गर्न बनेको विधेयकमाथि छलफल भएको छ । आइतबार प्रदेश सभाको बैठकमा संस्कृति, पर्यटन तथा सहकारीमन्त्री पुकार महर्जनले विधेयकमाथि सैद्धान्तिक छलफल होस् भनी संसद्मा प्रस्ताव टेबुल गरेका थिए । प्रदेश सभाको आज साँझ बसेको दोस्रो बैठकमा सो विधेयकमाथि छलफल भएको हो । 

प्रदेश सभा सदस्यहरु क्रमश, रमा आले मगर, सुरेन्द्रराज गोर्साइँ, सृजना सैंजू, मधुसुदन प्रसाद पौडेल, बसन्त मानन्धरलगायतले विधेयकमाथि आ–आफ्नो धारणा राखेका थिए । 
छलफलको क्रममा प्रदेश सभाका सदस्यहरुले सरकारद्वारा प्रस्तुत गरिएको सो विधेयक प्रशंसनीय रहेको भन्दै प्रदेशको अन्य जिल्लामा रहेका सुनुवार, जिरेल र मगर भाषालाई पनि उत्थान गर्नुपर्ने बताए । उनीहरुले नेवारी परम्परा अनुसारको जात्रा पर्वलाई सम्पदा सूचीमा संरक्षण गर्नेतर्फ प्रदेश सरकारको ध्यान जानुपर्ने उल्लेख गरे । 

प्रश्नको जवाफ दिँदै सहकारीमन्त्री महर्जनले सरकारले संघीयताको आधार स्वरुप प्रदेश सरकारले दीर्घकालिन भाषिक विकासको लागि पहिलो चरणमा नेवारी र तामाङ भाषालाई प्राथमिकता दिएर कार्यान्वयनमा ल्याउन लागेको बताए । 

उनले प्रदेशको विभिन्न जिल्लामा रहेका आदीवासी जनजाति, दलितहरुको पनि मातृभाषासहितको भाषिक विकासको लागि क्रमशः विधेयकहरु प्रस्तुत गर्दै लैजाने सरकारको नीति रहेको उल्लेख गरे ।