काठमाडौं : फिफा विश्वकप २०२६ को प्रारम्भिक छनोटको पहिलो खेलमा नेपालले बिहीबार लाओसको सामना गर्दैछ । त्रिपुरेश्वरस्थित दशरथ रंगशालामा हुने खेलका लागि आफू उत्साहित रहेको नेपाली राष्ट्रिय फुटबल टोलीका मुख्य प्रशिक्षक भिसेन्जो अल्बर्टो एनेसले बताएका छन् । ‘लाओसको सामना गर्नका लागि उत्साहित छौं । लाओससँगको खेल हाम्रा लागि निकै महत्वपूर्ण छ । लाओसविरुद्ध मैदान उत्र्न हामी तयारी अवस्थामा छौं’, प्रशिक्षक एनेसले भने, ‘हाम्रा सबै खेलाडी फिट छन् । घरेलु मैदानको फाइदा उठाउने अभियानमा छौं ।’ उनले आओससँगको खेलका लागि दुई महिनाको तयारी गरेको बताउँदै म्यानमार तथा स्थानीय क्लबसँगको मैत्रीपूर्ण खेलको फाइदा पुग्ने बताए ।
प्रशिक्षक एनेसले गत मार्चमा थ्री नेसन्स कपमा लाओसको सामना गरेको स्मरण गर्दै त्यतिबेला र अहिलेको टोलीमा निकै परिवर्तन भइसकेको बताए । ‘लाओसको टोली फेरिएको छ । उनीहरूले पनि राम्रो तयारी गरेका छन्’, उनले भने, ‘खेल रोमाञ्चक हुनेछ । हामी जित निकाल्दै दोस्रो चरणमा पुग्ने प्रयासमा हुनेछौं ।’
कप्तान किरण चेम्जोङले विश्वकप छनोटको दोस्रो चरणमा पुग्न नेपाली टोली आतुर रहेको बताए । ‘विश्वकप छनोटका लागि राष्ट्रिय टोलीले लामो तयारी गरेको छ । खेलाडीहरूमा थप उत्साह थपिएको छ’, किरणले भने, ‘ ट्याक्टिकल र फिजिकल रुपमा हामी तयारी अवस्थामा छौं ।’
नेपाली टोली घोषणा
फिफा विश्वकप २०२६ छनोटको प्रारम्भिक चरणअन्तर्गतको घरेलु मैदानमा हुने खेलका लागि नेपाली टोलीको घोषणा भएको छ । मुख्य प्रशिक्षक भिसेन्जो अल्बर्टो एनेसले बुधबार २३ सदस्यीय टोली घोषणा गरेका हुन् ।
किरण चेम्जोङको कप्तानीमा रहेको नेपाली टोलीको गोलरक्षकमा दीप कार्की र अभिषेक बराल छन् । यस्तै रक्षकमा सनिश श्रेष्ठ, अनन्त तामाङ, आशिष गुरुङ, रोहित चन्द, अञ्जन राई, आशिष चौधरी, अमृत श्रेष्ठ र अरिक विष्ट छन् । यसैगरी मिडफिल्डरमा सुदीप गुरुङ, लाकेन लिम्बू, आवास लामिछाने, उत्सव राई, कृतिशरत्न छुञ्जु र मनिष डाँगी छन् । मुख्य प्रशिक्षक एनेसले नेपाली टोलीको आक्रमणको जिम्मेवारी भने अञ्जन विष्ट, आयुष घलान, जिलेस्पीजंग कार्की, दिनेश हेन्जन, हिसुब थपलिया र सञ्जिव विष्टलाई सुम्पिएका छन् ।
प्रतिक्रिया दिनुहोस !
