जयन्ती मंगला काली...
देशको जर्जर आर्थिक अवस्थाबीच हामीमाझ महान् एवं उल्लासमय चाड बडादसैं भित्रिएको छ । मुलुकको अर्थतन्त्र संकुचनमा छ । व्यापार–व्यवसाय चौपट छन् । महँगी थामिन सक्नु छ । यातायात र हवाई भाडा चढिनसक्नु छ । अर्थतन्त्रको संकटसँगै कैयौं बेरोजगार भएका छन् । चाड भनेर के गर्नु, रोजगारीका लागि खाडी र मलेसिया उड्नेको ताँती विमानस्थलमा बढिरहेको छ । अर्थतन्त्रलाई राजनीतिले त्राण दिन सकिरहेको छैन । सरकारहरूका अदूरदर्शी नीतिका कारण दसकौंदेखि ओरालो लागेको अर्थतन्त्र उक्सिनै हम्मे पर्ने गरी थला परेको छ । यस्तो परिवेशमा दसैं आएको छ ।
यति खल्लो दसैं शायदै आउँछ । दसंै चाड मात्र होइन, महान् उत्सवसमेत हो । परिवार र नातागोतासँग रमाउने अनुपम अवसर हो । टाढा–टाढा रहेका परिवार र नातागोता भेला भएर यो पर्व मनाइन्छ । यसले सम्मान, मित्रता, भाइचारा अभिवृद्धि गर्छ । यसमा व्यक्ति–व्यक्ति र परिवार–परिवारको आर्थिक पक्ष जोडिएको हुन्छ । तर, अर्थतन्त्र नै खिइसकेको अवस्थामा जनमानसमा असन्तुष्टि र निराशा छ ।
तर, निराशालाई आशा र अपेक्षामा बदल्नु छ । माता दुर्गाले तमाम नेपालीजनलाई त्यो क्षमता प्रदान गरून्, हार्दिक शुभकामना । किनभने, पन्ध्र दिनसम्म मनाइने मुलुकको सबभन्दा ठूलो पर्व यही हो । यसलाई हामीले यथासक्य उल्लासपूर्ण बनाउनु नै छ । दसैंको उल्लेखनीय पक्ष भनेकै ठूलाबडाबाट आशीर्वाद थाप्ने हो । सत्यको विजय, राक्षसी शक्तिको पराजयको प्रतीक मानिने दसैं नेपालीको साझा चाड हो । यसमा प्रयोग गरिने मन्त्रले सुख, शान्ति, समृद्धि, सुस्वास्थ्य र दीर्घायुको कामना गर्छन् ।
जयन्ती मंगला काली भद्रकाली कपालिनी
दुर्गा क्षमा शिवा धात्री स्वाहा स्वधा नमोस्तुते ।
केही कालखण्डयता दसैंको सांस्कृतिक पक्षमा पनि कमजोर हँुदै गएको छ । देखासिखी, प्रदर्शनी, जुवा, तास, जाँड, रक्सी आदिको प्रयोगले यति महान् चाडमा प्रदूषण थप्दै लगेको छ । यसलाई भड्किलो र रवाफिलो बनाउँदै लगिएको पाइन्छ । जसका कारण धनी–गरिब, ठूला–सानाको खाडल देखा पर्छ । त्यो अवस्थालाई न्यूनीकरण गरी दसैंको मौलिक सांस्कृतिकतालाई बचाउनुपर्छ । यी सबै नराम्रा पक्षलाई राम्रामा, खराब अवस्थालाई असलमा र दुर्दिनलाई सुदिनमा बदल्न दुर्गा भगवतीले शासन, नीति निर्मातादेखि जनतासम्मलाई दक्षता प्रदान गरून् । देश उज्यालो दिनमा प्रदेश गरोस् । जनताको मुहारमा कान्ति छरियोस् । विजयादशमी २०८० को हार्दिक शुभकामना ।