बागलुङ : बागलुङमा जारी प्रदेशस्तरीय बागलुङ कप टी-२० क्रिकेट प्रतियोगितामा नवलपुर र स्याङ्जा सेमिफाइनलमा प्रवेश गरेका छन्। मंगलबार नवलपुरले तनहुँलाई ५५ रनले पराजित गरेपछि समूह बीबाट एक खेल अगावै स्याङ्जा र नवलपुरले सेमिफाइनलमा स्थान बनाएका हुन्।
समूह चरणको दोस्रो खेलमा २ सय १२ रनको विजयी लक्ष्य पछ्याएको तनहुँ १७.५ ओभरमा १५६ रनमा अलआउट भयो। तनहुँका लागि दिनेश बुढा मगरले ४५ बलमा ९७ रनको अर्धशतकीय इनिङ खेलेपनि जितको लागि प्रयाप्त रहेन। १० चौका र ८ चक्का प्रहार गरेका दिनेश शतक बनाउन ३ रनले चुके।
तनहुँको लागि आनन्द सुनारले १२ र चन्द्रकान्त पौडेलले १० रन बनाए। खेलको म्यान अफदी म्याच बनेका नवलपुरका कप्तान कमल परियारले ४ ओभरमा १६ रन खर्चेर ४ विकेट लिए। सुदिप अर्यालले २ र सागर डोटेलले १ विकेट लिए।
त्यसअघि टस जितेर पहिले व्याटिङ गरेको नवलपुरले रविन शर्मा र सुदिप अर्यालको अर्धशतकको मद्दतमा २ सय ११ रनको विशाल योगफल बनाएको थियो। रविनले ३९ बलमा ५ चौका र ४ चौकाको मद्धतमा ५९ रन बनाए। १९ बलमा अर्धशतक पुरा गरेका सुदिपले २१ बलमा ६ चौका र ४ छक्काको मद्धतमा ५२ रनको विष्फोटक इनिङ खेलेका थिए। नवलपुरका प्रनिश अर्यालले १७ बलमा २५ रन बनाए। तनहुँको लागि सन्दीप पराजुलीले ४ ओभरमा ३६ रन खर्चेर ३ विकेट लिए। दिनेश बुढा मगरले २ र चन्द्रकान्त पौडेलले १ विकेट लिए।
समूह चरणको दुई खेलमा पराजित हुँदै तनहुँले खाता नखोली प्रतियोगिताबाट बाहिरिएको छ। समूह ‘बी’को विजेता र उपविजेताको लागि बुधबार नवलपुर र स्याङ्जाबीच खेल हुने बागलुङ जिल्ला क्रिकेट संघका सदस्य एवं प्रतियोगिताका मिडिया फोकलपसर्न अभिषेक कटुवालले बताए।
प्रतिक्रिया दिनुहोस !
