स्याङ्जा : जिल्ला प्रशासन कार्यालय स्याङ्जाले तिहारका बेला खेलिने देउसी भैलो रातको १० बजेसम्म मात्र संचालन गर्न सूचित गरेको छ। सांस्कृतिक कार्यक्रम गर्दा सार्वजनिक यातायात, सामाजिक जीवन र कसैका इच्छा र चाहना विपरितका कार्य नगरी शान्तिपूर्ण वातावरणमा मनाउन समेत अनुरोध गरेको छ।
भाइचारा र आत्मियताको सम्बन्ध बढाउँदै आ-आफ्ना चाडपर्व, संस्कृति र परम्परा बमोजिम मनाउन र अरुका धर्मसंस्कृतिलाई ठेस पुग्ने कार्य नगर्न नगराउन सुझाव दिंदै स्याङ्जा प्रशासनले अत्यन्त जरुरी सूचना भन्दै ८ बुँदे निर्देशन निकालेको छ।
निमित्त प्रमुख जिल्ला अधिकारी दिपक पौडेलद्वारा जारी सूचनामा पटका, भूईंचम्पा, अतिसवाजी, विस्फोटक पदार्थ जस्ताको बस्तुको प्रयोग र जुवा, तास र कौडा जस्ता खेलमा निषेध गरिएको छ।
सार्वजनिक स्थलमा मादकपदार्थ सेवन गरी होहल्ला गर्ने, झै-झगडा गर्ने तथा अशान्ति कायम हुने खालका गतिविधि नगर्न, दिपावलीको अवसरमा विजुली तथा मैनबत्ति जस्ता सामग्रीको सावधानी पूर्वक प्रयोग गर्न आग्रह गरेको छ।
यस्तै सवारी साधनमा झुण्डिएर यात्रा नगर्न-नगराउन, यात्रुसँग बढी पैसा नअसुल्न, बजारमा कृतिम अभाव सिर्जना नगर्न, कालोबजारी नगर्न अनुरोध गर्दै सूचनाको अवज्ञा गरेमा प्रचलित कानून बमोजिम कारवाही गरिने सूचनामा उल्लेख छ।
प्रतिक्रिया दिनुहोस !
