विराटनगर : मोरङको पथरीशनिश्चरेमा पिठारीको रुखबाट लडेर महिलाको मृत्यु भएको छ । पथरीशनिश्चरे नगरपालिका–५ शान्ति टोलकी अन्दाजी ३६ वर्षीया कल्पना श्रेष्ठको मृत्यु भएको मोरङ प्रहरीका प्रवक्ता डीएसपी रन्जनकुमार दाहालले जानकारी दिए ।
उनका अनुसार पिठारीको रुखमा चढेर घाँस काट्ने क्रममा त्यहाँबाट खसेर उनी घाइते भएकी थिइन् । रुखबाट खसेर बिहीबार बिहान ८:३० बजेतिर घाइते भएकी कल्पनालाई उपचारका लागि विराटनगरको आर्या न्यूरो अस्पताल ल्याइएको थियो ।
उपचारकै क्रममा शुक्रबार दिउँसो १ : १० बजेतिर मृत्यु भएको प्रहरीले दाहालले बताए । घटना बिहानको भएपनि प्रहरीले भने बेलुका मात्रै जानकारी पाएको थियो । घटनाको अनुसन्धान सुरु गरिएको दाहालले बताए ।
प्रतिक्रिया दिनुहोस !
