उदयपुर : जिल्ला अदालत उदयपुरले गरेका फैसला कार्यान्वयनका क्रममा प्रहरीले ८ जना फरार प्रतिवादी पक्राउ गरेको छ।
मुद्दा सञ्चालनका क्रममा र फैसला पछि फरार रहेका उनीहरूलाई जिल्ला प्रहरी कार्यालय र मातहतका युनिटबाट खटिएको विशेष टोलीले पक्राउ गरेको हो। पक्राउ परेका ८ जनालाई अदालतमा उपस्थिति गराई कारागार चलान गरिएको प्रहरी प्रमुख एसपी रमेश थापाले बताए।
उनका अनुसार ज्यान मार्ने उद्योगमा चौदण्डिगढी नगरपालिका-२ का ३१ वर्षीय मानबहादुर कालिकोटे, सवारी ज्यानमा वडा नम्बर १ का २१ वर्षीय सूर्य परियार, एक बालक, लागूऔषध मुद्दामा ताप्ली गाउँपालिका-१ का २४ वर्षीय लेखबहादुर मगर रहेका छन्।
मानबहादुरलाई ४ वर्ष ११ महिना, सूर्य र बालकलाई १ वर्ष ११ महिना ८ दिन र लेखबहादुरलाई ११ महिना ५ दिन कैद र ५ हजार जरिवाना सजाय तोकिएको उनले बताए।
त्यसैगरी वन मुद्दामा १८ दिन कैद सजाय तोकिएका त्रियुगा नपा-७ का ५३ वर्षीय प्रकाशबहादुर दनुवार, ३ दिन सजाय तोकिएका सोही ठाउँका ४५ वर्षीय सन्तबहादुर दनुवार रहेका छन्।
प्रहरीले कुटपिट मुद्दामा एक सय जरिवाना सजाय तोकिएका चौदण्डी नपा- ९ का २६ वर्षीय चोकमान तामाङ र ३३ वर्षीय मरिचमान तामाङ रहेको बताएको छ। प्रहरीले अदालतको फैसलालाई कार्यान्वयन तहमा पुर्याउन अभियान नै सञ्चालन गरेको एसपी थापाले बताए।
प्रतिक्रिया दिनुहोस !
