रौतहट : काठको गोलियासहित दर्जन बढी व्यक्ति पक्राउ परेका छन्। डिभिजन वन कार्यालय रौतहटले शनिबार सयौँ क्यूफिट सालको काठसहित एक दर्जन बढी व्यक्तिलाई पक्राउ गरेको हो।
राष्ट्रिय वनमा तस्कर प्रवेश गरेको सूचनाका आधारमा गएको गस्ती टोलीले साइकलसहित काठ बरामद गरेको डिभिजन वन कार्यालय रौतहटका प्रमुख शैलेन्द्रकुमार मिश्रले जानकारी दिए।
दुई दिनअघि पनि सशस्त्र वन सुरक्षा गस्ती टोलीले रौतहटको बलेरी जंगलबाट दुईवटा साइकल जोडेर लोड गरिएका सालको गोलिया र साइकल बरामद गरेको थियो।
गत साउन १५ गते यता सशस्त्रको वन सुरक्षा टोलीले ३ सय ९७ क्यूफिट सालको काठ बरामद गरेको छ। सो अवधिमा काठ तस्करी र अवैध सिकारमा संलग्न १५ जनालाई पक्राउ गरेको जनाएको छ।
काठ तस्करीमा प्रयोग गरिएको पिकअप भ्यान १ थान, ट्याक्टर १ थान, टायर गाडा २ थान, मोटरसाइकल १ थान र साइकल १४ थान बरामद भएको डिभिजन प्रमुख मिश्रले जानकारी दिए।
प्रतिक्रिया दिनुहोस !
