काठमाडौं विश्वविद्यालयका १ सय १३ विदेशीसहित १ हजार ८३८ विद्यार्थी दीक्षित
मंसिर २७, २०८० बुधबार १५:५८:३७
काभ्रे : काठमाडौं विश्वविद्यालयमा २९ औं दीक्षान्त समारोहमा एक हजार ८ सय ३८ विद्यार्थी दीक्षित भएका छन् । आज दीक्षित हुनेमा विदेशी मुलुकका एक सय १३ विद्यार्थी रहेका छन् ।
बुधबार धुलिखेलमा भएको दीक्षान्त कार्यक्रममा प्रधानमन्त्री तथा कुलपति पुष्पकमल दाहाल ‘प्रचण्ड’को अध्यक्षता, वरिष्ठ चिकित्सक डा. गौरीशंकरलाल दासको प्रमुख आतिथ्यता दीक्षान्त कार्यक्रममा शिक्षा, विज्ञान तथा प्रविधिमन्त्री एवं सहकुलपति अशोक कुमार राई र शिक्षा, विज्ञान तथा प्रविधि राज्यमन्त्री प्रमिला कुमारीको उपस्थिति थिए।
दीक्षान्त कार्यक्रममा काठमाडौं विश्वविद्यालयबाट स्कुल अफ आट्र्स, एजुकेसन, इन्जिनियरिङ, ल, म्यानेजमेन्ट, मेडिकल साइन्सेज र साइन्स विधाका पीएचडी, डिएम र एमसिएच तहका १८ जना, एमफिल तहका ३८ जना, स्नातकोत्तर तहका ३ सय १४ जना, पिजिडी तहका ५२ जना, र स्नातक तहका १ हजार ४ सय १६ जना गरि जम्मा १ हजार ८ सय ३८ जना विद्यार्थी दीक्षित भएको विश्वविद्यालयले जनाएको छ ।
आज दीक्षित भएका आर्टस्का २ सय ९ जना, एजुकेसनका २ सय २५ जना, इन्जिनियरिङका ३९ जना, लका ३९ जना, मेनेजमेन्टका ४ सय ४८ जना, मेडिकल साइन्सेजका ७ सय ७७ जना र साइन्सका १ सय १ जना रहेको छ ।
दीक्षित हुने विद्यार्थीहरूमध्ये पुरुषको प्रतिशत ४६.०३ ९६ सय ४६ जना तथा महिलाको प्रतिशत ५३.९७ ९९ सय ९२ जना रहको विश्वविद्यालयले जनाएको छ । दीक्षित हुनेमध्ये विदेशी विद्यार्थीहरू ६.१५ प्रतिशत रहेका र तीमध्ये भारत, श्रीलङ्का र मालदिभ्सको गरी ३ देशका १ सय १३ जना विदेशी विद्यार्थी रहेका छन् ।
काठमाडौं विश्वविद्यालयको इतिहासमा पहिलोपटक स्कुल अफ इन्जिनियरिङ अन्तर्गत मास्र्टस अफ टेक्नोलोजी ईन आर्टिफिसियल इन्टेलिजेन्स १ जनालाई, स्कुल अफ मेडिकल साइन्सेज अन्तर्गत मास्टर अफ साईन्स ईन मिडवाईफेरी नर्सिङ्गमा ८ जनालाई र स्कुल अफ एजुकेसन अन्तर्गत मास्टर ईन हाईएर एजुकेसनमा ९ जनालाई उपाधि प्रदान गरिएको छ ।
उनन्तीसौं दीक्षान्त समारोहको पहिलो चरणको कार्यक्रमसम्ममा गरी काठमाडौं विश्वविद्यालयबाट ४३ हजार १ सय २३ जना उत्तीर्ण भई सकेको विश्वविद्यालयका प्रवक्ता तथा स्कुल अफ आर्टसकी सह प्राध्यापक, एक्कुमाया पुनले बताइन् ।
२९ औं दीक्षान्तमा यो वर्ष भाइस चान्सलर स्वर्ण पदक विराट मेडिकल कलेज,विराटनगरका सनम ढकालले प्राप्त गरेका छन् भने जुद्धबहादुर श्रेष्ठ स्वर्ण पदक स्कुल अफ मेनेजमेन्टका विनायक घिमिरेले प्राप्त गरेका छन् ।
रणबहादुर स्वर्ण पदक अंकित सुवेदी र न्हुछेरत्न तुलाधार स्वर्ण पदक संस्कृति ढकालले प्राप्त गरिन्।
प्रतिक्रिया दिनुहोस !
