ऐतिहासिक, धार्मिक र सांस्कृतिक सहर काठमाडौं देशको राजधानीमात्र भएन । अब विश्व भ्रमण गर्न चाहनेका लागि उत्कृष्ट गन्तव्य बनेको छ । यो मूलतः नेपाल र नेपालीका लागि विशेष गर्वको विषय हो । प्राचीन कलाकौशलले भरिएको काठमाडौं विश्वका लागि ‘विशेष गन्तव्य’ हो । त्यसैले त अन्तर्राष्ट्रिय अध्ययनहरूमा काठमाडौं विश्वमा घुम्नैपर्ने सहरहरूको सूचीमा पर्दै आएको छ । यसवर्ष ट्रिप एडभाइजरले विश्वको ‘उत्कृष्ट प्राकृतिक गन्तव्य’को पहिलो नम्बरमा हालै काठमाडौंलाई छनोट गरेको घोषणा गरेको छ । विश्व पर्यटनका प्रचार क्षेत्रमा नेपालका लागि यो ठूलो उपलब्धि हो ।
विश्वको सबैभन्दा ठूलो ट्राभल गाइडेन्स प्लेटफर्म ट्रिप एडभाइजरले एक अर्बभन्दा बढी समीक्षक र ८० लाखभन्दा बढी व्यवसायीको सुझाव संकलनपछि घोषणा गरेको यो सूचीमा नेपाल र नेपालीले गौरव मात्र गर्ने होइन बरु पर्यटन भिœयाउने रणनीतिका साथ काम गर्न जरुरी छ । सन् २०२४ का लागि उत्कृष्ट गन्तव्यमा समावेश भएको काठमाडौं प्राकृतिक गन्तव्य मन पराउने पर्यटकका लागि उत्कृष्ट गन्तव्य हुने एडभाइजरको सुझाव छ । जुन कस्तुरीले वीणा थाहा नपाएजस्तो भएको छ । हामीले पर्यटन क्षेत्रको प्रचार गरी विदेशी पर्यटकको आकर्षण बढाउन सकिरहेका छैनौं ।
कोभिड महामारीपछि ओरालो लागेको नेपालको पर्यटन क्षेत्र अझै सुधार हुन सकेको छैन । यस्तो समयमा विश्वभर काठमाडौं उत्कृष्ट गन्तव्यको रूपमा सूचीकृत र प्रचार हुनु सुखद कुरा हो । नेपाल सरकारले सन् २०२४ मा २० लाख बढी विदेशी पर्यटक भिœयाउने लक्ष्य राखेको छ ।
सन् २०२३ मा नेपालमा आउने पर्यटकको संख्या १० लाख नाघेको छ । विदेशी पर्यटक भित्र्याउन र उनीहरूको बसाइ लम्ब्याउन पर्यटन पूर्वाधारमा सुधार, असल सत्कार र प्रचार मुख्य कुरा हो । यी सबै कुरामा सरकार चुक्दै आएको छ । नेपाल पर्यटकका लागि उत्कृष्टसँगै सुरक्षित गन्तव्य हो भन्ने कुरा पनि विश्वव्यापी प्रचार हुन जरुरी छ । हुनमात्र होइन, भइरहन जरुरी छ । सरकारले सन् २०२४ सम्ममा पर्यटक आगमनलाई २०१९ को पूर्ववत् अवस्थामा पु¥याउने लक्ष्य राखेको छ ।
सरकार र पर्यटन क्षेत्रका सबै सरोकारवाला एकद्वार नीतिका साथ मिलेर काम गर्ने हो भने यो लक्ष्य भेट्न समस्या छैन । काठमाडांै जस्तै विश्व पर्यटनको सूचीमा पर्न सक्ने दर्जनौं पर्यटन भूमिलाई हामीले पर्यटन बजारमा पर्याप्त बिक्री गर्न सक्ने हो भने देशको जर्जर आर्थिक अवस्था सुधारका लागि कोसेढुंगाको काम हुनेछ ।
प्रतिक्रिया दिनुहोस !
