विकासका पूर्वाधारमा पछाडि पारिएको कर्णाली प्रदेशको राजधानी सुर्खेतमा १ अर्ब ५९ करोडको लागतमा अन्तर्राष्ट्रिय मापदण्डको रंगशाला निर्माण भएको छ । जसको क्षमता १० हजार दर्शक हो । प्याराफिट, फुटबल मैदान, एथ्लेटिक्स ट्र्याक र विभिन्न खेलका कभर्ड हल पनि छन् । यी सबै पूर्वाधारले यहाँको खेलकुद विकासमा ठूलो आशा जगाएको छ । यी पूर्वाधार तत्कालै उपयोगमा आउँदै पनि छन्, राष्ट्रिय खेलकुद प्रतियोगिताको अवसरमा । हो, मुलुकको ठूलो खेल महोत्सवको १०औं संस्करण आउँदो चैत २३ देखि ३० सम्म कर्णालीको सुर्खेतमा हुँदैछ । दसौं राष्ट्रिय खेलकुद प्रतियोगिता कसो होला, कहाँ होला भन्दाभन्दै कर्णालीमा तयार पूर्वाधारले यसको सुनिश्चिता पनि प्रदान गरेको छ ।
दसौं खेलकुदकै सन्दर्भमा धेरै खेल सुर्खेतमा भए पनि प्रतियोगिता प्रदेश राजधानीमा मात्रै सीमित हुँदै छैन । २४ खेलमध्ये ८ वटा बाँकी जिल्लामा हुँदै छ, त्यसका लागि पनि पूर्वाधार तयार भएको छ । कतिपयमा भने बजेट अभावले पूर्वाधार अधुरा पनि छन् । बरु समय छँदै सरकारले तिनलाई पूरा गर्नुपर्ने देखिन्छ । १०औं राष्ट्रिय खेलकुद प्रतियोगिताले कर्णालीको खेलकुद क्षेत्रमा सकारात्मक परिवर्तन पक्कै ल्याउने नै छ । त्यस कारण पनि यही मेसोमा यहाँ पूर्वाधार तयार गर्न सरकारले कन्जुस्याइँ गर्नु हुँदैन । प्रशिक्षक र खेलाडीको अभाव, छात्रावास तथा आवासगृहको अभावले यहाँका खेलाडीलाई निराश बनाएको छ । दैलेख, रुकुमपश्चिम, रास्कोटजस्ता स्थानमा अधुरो रंगशाला निर्माणको कथा अझै यथावत छ । दलगत विवाद र उपभोक्ता समितिहरूको राजनीति यस्ता आयोजनाहरूमा बाधक बनेका छन् । जुनचाहिँ पक्कै पनि बिडम्वनापूर्ण छ ।
शिक्षा, स्वास्थ्य र अरू विकासका आधारभूत आवश्यकताकै सन्दर्भमा कर्णाली राज्यबाट उपेक्षित भएको ठाउँ हो । होइन भने प्राकृतिक स्रोतले सौन्दर्यले यो ठाउँ धनी छ । त्यसको पहिचान र सदुपयोग पनि राज्यले गर्न नसकेकै हो । खेलकुद जस्ता गतिविधि हुँदा कर्णाली एकातर्फ राज्यको नजरमा परेको अनुभूति गर्न सकिन्छ भने सँगसँगै यहाँका पर्यटकीय पहिचान पनि यही बेला उजागर हुने छन् । खेलकुद भनेको आफैमा मनोरञ्जनमात्रै होइन, यो त राष्ट्रिय पहिचान र एकतासँग पनि सम्बन्धित छ । जसले सारा नेपालीलाई जोड्छ । त्यसको सेतु बन्ने अवसर कर्णालीलाई प्राप्त हुनु पनि उपलब्धि मान्नुपर्छ । बजेट अभाव, अपुरा केही पूर्वाधारको बहानामा राष्ट्रिय खेलकुद प्रतियोगिताको गरिमामा कुनै कमी आउन नदिने कर्तव्य सरकारको हो ।
प्रतिक्रिया दिनुहोस !
