शीतलहर र हुस्सुले सुनसरीको जनजीवन प्रभावित

धरान : शीतलहर र बाक्लो हुस्सुका कारण सुनसरीको जनजीवन प्रभावित भनेको छ। बाक्लो हुस्सु सँगै परेको शीतलहरका कारण जाडो बढेपछि दैनिक जनजीवन प्रभावित बनेको हो। 

जाडो बढेपछि वृद्ध बृद्धा र बालबालिकाहरु समस्यामा परेका छन्। जाडोका कारण बालबालिकाहरुमा ज्वरो आउने, बान्ता आउने र रुखाखोकीको समस्या आउन थालेको विजयपुर अस्पताल धरानका बालरोग विशेषज्ञ डा. प्रल्हाद न्यौपानेले बताए। 

बाक्लो हुस्सुका कारण यातायातका साधन सञ्चालनमा गम्भीर समस्या उत्पन्न भएको धरान- काठमाडौं न्यु कोशी बसका संचालक दिनेश कोइरालाले बताए। उनले बाक्लो हुस्सुका कारण हप्ता दिनदेखि तराई सुनसरी, सप्तरी, सिराहा, धनुषा र महोत्तरी जिल्ला हुँदै काठमाडौं-धरान यातायातका साधन सञ्चालनमा समस्या भएको बताए।

जाडोका कारण विद्यालय र कलेज जाने विद्यार्थीहरु समेत प्रभावित भएका छन्। जाडोका कारण विद्यालयमा आगो बालेर ताप्नु परेको सहिद स्मृति माविका विद्यार्थी प्रज्वल गिरीले बताए। जाडोका कारण सुनसरीको धरान, इटहरी, इनरुवा, दुहबी, झुम्का, भाण्टाबारी लगायतका स्थानको जनजीवन प्रभावित बनेको छ।