संसद भवन प्रवेश गर्ने मिटरव्याज-लघुवित्त पीडितलाई बिना सर्त रिहाई गर्न गृहमन्त्रीसँग एमालेको माग
काठमाडौं : नेकपा एमालेले संसद् भवन प्रवेश गरेर आन्दोलन गर्ने मिटरव्याज-लघुवित्त पीडितहरूलाई बिना सर्त रिहाई गर्न सरकारसँग माग गरेको छ।
बुधबार एमाले संसदीय दलले उपप्रधान एवं गृहमन्त्री नारायणकाजी श्रेष्ठसँग छलफल गर्दै सरकारको सुरक्षाकमजोरीका कारण मिटरव्याज-लघुवित्त पीडितहरू संसद भवन प्रवेश गरको भन्दै उनीहरूलाई बिना सर्त रिहाई गर्दै मुद्दा नचलाउन माग गरेको हो।
४८ जना महिला र एक जना पुरुष आन्दोलनकारीलाई प्रहरीले पक्राउ गरी मुद्दा चलाउने तयारी गरेको छ। त्यस्तै एमालेले सुरक्षा कमजोरी गर्नेलाई कारबाही गर्न माग गरेको छ भने मिटरव्याज-लघुवित्त पीडितको माग सम्बोधन गर्ने सुनिश्चितता गर्नसमेत माग गरिएको एमाले सचेतक महेश बर्तौलाले जानकारी दिए।
त्यस्तै बानेश्वर र सिंहदरबार वरिपरि सर्वसाधारणलाई हिंड्नसमेत रोक लगाएर तारवार लगाएको भन्दै यस्तो काम बन्द गर्न माग गरेको उनले बताए। जवाफमा गृहमन्त्रीले मिटरव्याज-लघुवित्त पीडितहरूको बिना सर्त रिहाई र मुद्दा नचलाउने गरी सहजीकरण गर्ने र मिटरव्याज-लघुवित्त पिडितको माग सम्बोधन हुनेगरी वार्तामा भूमिका निर्वाह गर्ने प्रतिवद्धता जनाएको बर्तौलाले बताए।