कलंकी नापीका सर्भेक्षक चौलागाई र लेखापढी पोखरेलविरुद्ध अख्तियारले हाल्यो मुद्दा
![कलंकी नापीका सर्भेक्षक चौलागाई र लेखापढी पोखरेलविरुद्ध अख्तियारले हाल्यो मुद्दा](https://annapurnapost.prixacdn.net/media/albums/akhatiyar-office_20191202093301_wUE2lzNPgn_UUfBcogYro.jpg)
काठमाडौं : नापी कार्यालय कलंकीमा कार्यरत सर्भेक्षक लक्ष्मीप्रसाद चौलागाई र राजधानी लेखापढी सेवाका कर्मचारी नेत्रबहादुर पोखरेलविरुद्ध भ्रष्टाचार मुद्दा दायर भएको छ।
अख्तियार दुरूपयोग अनुसन्धान आयोगले जग्गा कित्ताकाट गरी पूर्जा उपलब्ध गराइदिने बहानामा सेवाग्राहीसँग घुस माग गरेको पुष्टि हुन आएकाले सर्भेक्षक चौलागाई र लेखापढी पोखरेलविरुद्ध आज विशेष अदालत काठमाडौंमा भ्रष्टाचार मुद्दा दायर गरेको हो।
उनीहरूविरुद्ध सेवाग्राहीसँग घुस माग गरेको उजुरी परेको थियो। सोही उजुरीका आधारमा अनुसन्धानका क्रममा अख्तियारको टोलीले सर्भेक्षक चौलागाई र लेखापढी पोखरेललाई १ लाख घुसहित नियन्त्रणमा लिएको थियो।
दुवैजनाको मिलेमतोमा जग्गाधनी पूर्जा उपलब्ध गराउनका लागि सेवाग्राहीसँग १ लाख रकम लिएको र उक्त रकममध्ये ५० हजार रुपैयाँ सर्भेक्षक चौलागाईंले लिएको पुष्टि हुन आएकाले मुद्दा दायर गरेको अख्तियारका प्रवक्ता नरहरि घिमिरेले जानकारी दिए। उनीमाथि ५० हजार बिगो जरिवाना र सजाय माग गरिएको आरोप-पत्रमा उल्लेख छ।
यसैगरी लेखापढी पोखरेले जग्गाधनी पूर्जा उपलब्ध गराउनका लागि भनी १ लाख रुपैयाँ घुस लिएको देखिएकाले उनीविरुद्ध सोही रकम बराबरको बिगो बमोजिम जरिवाना माग गरिएको अख्तियारले जनाएको छ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)