हेटौंडा : बागमती प्रदेशको आगामी आर्थिक वर्ष २०८१/०८२ को नीति तथा कार्यक्रम जेठ १४ गते प्रस्तुत हुने भएको छ ।
सभामुख भुवनकुमार पाठकका अनुसार जेठ १४ गते बस्ने प्रदेश सभाको बैठकमा नीति तथा कार्यक्रम सार्वजनिक हुँदै छ । त्यसका लागि दलहरुबीच सहमति जुटिसकेको उनले बताए ।
बागमती प्रदेश प्रमुख यादवचन्द्र शर्माले सोही दिन सरकारको नीति तथा कार्यक्रमलाई सार्वजनिकरण गर्नुहुने प्रदेश सभा सचिवालयका प्रमुख सचिव कृष्णहरि खड्काले जानकारी दिए ।
त्यस्तै सभामुख पाठकले प्रदेश सभाको आज अपराह्न बस्ने बैठकमा प्रदेश सरकारको आर्थिक वर्ष २०८१/०८२ को विनियोजित बजेटको सैद्धान्तिक पक्ष र योजनाको प्राथमिकताको विषयमा छलफल हुने बताए ।
बजेटको सैद्धान्तिक पक्षमा भोलि पनि छलफल जारी रहने सचिवालयले जनाएको छ ।
प्रतिक्रिया दिनुहोस !
