अर्घाखाँची : अर्घाखाँचीको छत्रदेव गाउँपालिकाका झन्डै २ हजार घरधुरीमा एक घर एक धारा निर्माण गर्ने गरी बृहत् खानेपानी अयोजनाको काम अगाडि बढेको छ । अर्घाखाँचीकै नमुना योजनाका रूपमा रहेकोे हाँडेखोला चिदीका बृहत् पम्पिङ खानेपानी आयोजनाको निर्माणको कार्य तीव्र गतिमा बढेको हो ।
संघीय खानेपानी तथा ढल व्यवस्थापन आयोजना अर्घाखाँचीले निर्माण कार्य तीव्र बनाएपछि छत्रदेव गाउँपालिकाका वडा नम्बर १, २, ३, ४ र ५ अर्थात् साविक चिदीका, बल्कोट, केरुंगा र छत्रगञ्ज गाविसका झन्डै ९ हजार स्थानीय लाभान्वित हुने खानेपानी तथा ढल ब्यबस्थापन आयोजनाका इन्जिनीयर सुदीप ज्ञवालीले बताए ।
खानेपानीको अत्यन्तै समस्या रहेको यस स्थानका मानिस एक गाग्री पानी ल्याउन घण्टौं लगाएर पँधेरोमा धाउनुपर्ने बाध्यता छ । सुख्खाग्रस्त क्षेत्रका रूपमा रहेको छत्रदेव गाउँपालिकामा खानेपानी आयोजना सम्पन्न भएपछि खानेपानीको कुनै समस्या नहुने आयोजना उपभोक्ता समितिका अध्यक्ष शोभाखर खनालले बताए ।
छत्रदेव गाउँपालिकाको पूर्वमा रहेको चिदीका देखि छत्रगञ्जसम्मका ५ वटा वडाका झन्डै २ हजारभन्दा बढी घरपरिवार लाभान्वित हुने कार्यालयका नायव सुब्बा कृष्ण बर्माले बताए । यो बृहत् पम्पिङ खानेपानी योजना संघीय खानेपानी तथा ढल व्यवस्थापन आयोजनाको अर्घाखाँचीबाट निर्माण कार्य अगाडि बढीरहेको छ । ३० करोड २२ लाखको लागतमा खानेपानी योजनाको ठेक्का सम्झौता भएको र सोही अनुसार सागर विडारी निर्माण सेवाले निर्माण कार्य अगाडि बढाएको संघीय खानेपानी तथा ढल व्यवस्थापन आयोजनाका इन्जिनियर सुदीप ज्ञवालीले बताए ।
२०७९।१२।१ गते ठेक्का सम्झौता भएको यो योजना २०८१।११।३० गतेसम्म सम्पन्न गर्ने गरी निर्माण व्यवसायीले काम गरिरहेको छ । योजना निर्माण सुरु भएको १३ महिनाको अवधिमा झण्डै ५० प्रतिशत भौतिक प्रगति भएको संघीय खानेपानी तथा ढल व्यवस्थापन आयोजनाका प्रमुख इन्जिनीयर किरण आचार्यले बताए । वित्तीय प्रगति ४२ प्रतिशत भइसकेको उनको भनाइ छ । २ स्टेज पम्पिङ रहेको यो योजनामा कलेक्टर वेलबाट माथि ट्रिटमेन्ट प्लान्टमा पहिलो पम्पिङ गर्ने र त्यस स्थानमा पानी प्रशोधित भइसकेपछि मौलीपोखराको ६० घन मिटरको ट्यांकीमा पानी जान्छ । मौलीपोखराको ट्यांकीबाट सिधैं कोटमा रहेको १ सय २० घन मिटरको ट्यांकीमा पानी खसालेपछि त्यहाँँबाट ५ वटा वडाका विभिन्न स्थानमा बनेका टं्याकीमा पानी लैजाने गरी काम अगाडि बढेको इन्जिनीयर सुदीप ज्ञवालीको भनाइ छ ।
खानेपानी आयोजना मार्फत झन्डै २ हजार घरधुरीमा एक घर एक धारा बन्ने भएपछि सबै उपभोक्ताहरू खुशी भएका हाडेखोला चिदीका बृहत् पम्पिङ खानेपानी तथा सरसफाइ आयोजना उपभोक्त समितिका सचिव नारायण प्रसाद खनालले बताए ।
विगत लामो समयदेखि डीपीआर भएर काम अगाडि बढ्न नसकेको आयोजना निर्माण सुरु भएर झण्डै ५० प्रतिशतभन्दा बढी भौतिक प्रगति भएपछि सबै उपभोक्ताहरू खुशी भएका हुन् । जिल्लाकै गौरवको योजनाका रूपमा रहेको यो योजना सम्पन्न भएपछि बिहानै उठेर घण्टौं लगाएर पँधेरोबाट पानी ल्याउने बाध्यता पनि हट्ने भएपछि सबै उपभोक्ता खुशी भएका उपभोक्ता समितिका उपाध्यक्ष हरिप्रसाद खनालको भनाइ छ ।
प्रतिक्रिया दिनुहोस !
