काठमाडौं : हिमाल, जनता र जलवायु परिवर्तनसम्बन्धी विज्ञ संवाद हुने भएको छ। नेपाल सरकारले बुधबार र बिहीबार काठमाडौंको चन्द्रागिरि हिलमा अन्तर्राष्ट्रिय विज्ञ संवाद सम्मेलनको आयोजना गर्दैछ।
प्रधानमन्त्री पुष्पकमल दाहाल ‘प्रचण्ड’ले सम्मेलनको उद्घाटन गर्ने कार्यक्रम रहेको छ। २८औँ कोप सम्मेलनमा उठाइएको ‘कसले हामीलाई क्लाइमेट क्राइसिसबाट बचाउँछ ?’ भन्ने साइड इभेन्ट संवादको नेतृत्व गर्दै काठमाडौंमा संवादको आयोजना गर्न लागिएको हो।
प्रधानमन्त्रीले संयुक्त राष्ट्रसंघीय फ्रेमवर्क कन्भेन्सन आन क्लाइमेट चेन्ज (यूएनएफसीसीसी) वार्ता प्रक्रियामा पर्वतीय एजेन्डालाई बढावा दिँदै जलवायु परिवर्तनको बारेमा आवाज उठाउने घोषणा गरेका थिए। नेपालले संयुक्त राष्ट्रसंघको सम्मेलनमा संरक्षण र जलवायु परिवर्तनका लागि निरन्तर वकालत गर्दै आएको छ।
सम्मेलनमा यूएनएफसीसीसी अन्तर्गतको एसबीएसटीएका अध्यक्ष, बंगलादेश तथा भुटानका मन्त्रीहरू, किर्गिज गणतन्त्रका विशेष राजदूतको उपस्थिति रहनेछ। यसैगरी, पर्वत साझेदारीका प्रतिनिधि, विकास साझेदारहरू, उच्च स्तरका कर्मचारीहरू कार्यक्रममा सहभागी हुनेछन्। कार्यक्रममा जलवायु परिवर्तन, हिमाली र सामुद्रिक समस्यामा व्यापक रूपमा काम गरिरहेका २५ भन्दा बढी देशका दुई सयभन्दा बढी सहभागी सहभागी हुनेछन्।
वन तथा वातावरण मन्त्री नवलकिशोर साह सुदीले हिमाली समस्यालाई विश्वव्यापी जलवायु वार्ताको रूपमा अगाडि बढाउन विभिन्न पक्षसँग सहकार्य गर्न तयार रहेको बताए। उनले थपे, ‘यो सम्मेलन पहाड, मानिस र जलवायुसम्बन्धी अन्तर्राष्ट्रिय विज्ञ संवादको ‘कसले हामीलाई जलवायु संकटबाट बचाउँछ ?’ शीर्षकको उच्च–स्तरीय साइड इभेन्टको फलोअप हो।’
प्रतिक्रिया दिनुहोस !
