हेटौंडा उपमहानगरपालिका महिलाको नेतृत्वमा अघि बढिरहेको छ । त्यसैगरी यस प्रदेशको राजधानीसमेत भएको नाताले यो नगरको प्राकृतिक, प्रशासनिक र राजनीतिक सौन्दर्य बढाउन हामी अग्रसर छौं । समाजको समुचित, समानुपातिक विकास र रूपान्तरणका लागि महिला सशक्तीकरण अपरिहार्य हुन्छ । यही मान्यतालाई आत्मसात गर्दै हेटौंडामा महिला नेतृत्व स्थापित गर्ने गरी काम कारबाहीहरू अघि बढाइरहेका छौं ।
महिला विकासका लागि अनिवार्य शिक्षा, स्वास्थ्य सेवा र आर्थिक आत्मनिर्भरता अत्यन्त महत्वपूर्ण पक्ष हुन् । महिलालाई उच्च शिक्षाको अवसर प्रदान गर्नुका साथै स्वास्थ्य सेवामा सहज पहुँच सुनिश्चित गर्नु स्थानीय सरकार अर्थात् हाम्रो प्रमुख लक्ष्य हो । यही कुरालाई बुझेर हामीले हेटौंडा उपमहानगरको १३ र १६ नम्बर वडामा अस्पताल सञ्चालनमा ल्याएका छौं । यसले अस्पतालमा सहज स्वास्थ्य पहुँच नपुगेका महिलालाई न्याय गर्छ भन्नेमा हामी विश्वस्त छौं ।
महिलालाई आय आर्जनका माध्यमबाट आत्मनिर्भर बनाउन हामीले बिभिन्न सीपमूलक तालिम र लघु पुँजी सहयोग गरिरहेका छौं । यो कार्यले उनीहरू आफ्नो खुट्टामा आफैं उभिन सक्नेछन् । यसका लागि म नेतृत्वमा आइसकेपछि उपमहानगरका करिब ९ सय महिलालाई सीपमूलक तालिम दिएर ३ सय ५० महिलालाई प्रत्यक्ष रोजगारीमा जोडेका छौं । सीप सिकेपछि १३ वटा लघुउद्योगमा जोडिएर दिगो आयआर्जन र आत्मनिर्भताको यात्रामा अघि बढिरहेको देख्दा र सुन्दा आनन्द लाग्छ । महिला उद्यमशीलतालाई प्रोत्साहन गर्न र महिला उद्यमीहरूको क्षमता विकास गर्न वार्षिक रूपमा योजना बनाएर काम गरिरहेका छौैं । उनीहरूले उत्पादन गरेका सामग्रीलाई बजारीकरण गर्न कोसेली घर सञ्चालन गर्दै व्यावसायिक सीप हस्तान्तरण गर्नुका साथै नेटवर्किङको अवसरसमेत प्रदान गरेका छौं ।
हेटौंडालाई महिलामैत्री सहरका रूपमा विकास गर्ने प्रतिबद्धतासाथ हामी अघि बढिरहेका छौं । महिला नेतृत्व, आत्मनिर्भरता तथा आर्थिक स्वालम्बन पछि मात्रै राजनीतिक नेतृत्वमा दाबी गर्न सकिन्छ । त्यसपछि मात्र पुरुषसरह सह अस्तित्वको लडाइँमा सहभागी हुन सकिने रहेछ । त्यसैले मूलत विकास भन्नेबित्तिकै भौतिक वस्तु र पूर्वाधारहरूलाई मात्रै परिभाषित गर्ने पुरानो शैलीलाई फेरेर महिला विकासलाई प्राथमिकतामा राख्नु जरुरी छ ।
(लामा हेटौंडा उपमहानगरपालिकाकी नगर प्रमुख हुन् ।)
प्रतिक्रिया दिनुहोस !
