नुवाकोटको  तारकेश्वरमा साताको एकदिन विद्यालयमा मौलिक पहिचानसहितको पोशाक लगाउनुपर्ने

नुवाकोट : नुवाकोटको  तारकेश्वर गाउँपालिकाले विद्यालयमा मौलिक पहिचानसहितको पोशाक लगाउनु पर्ने निर्णय गरेको छ । साताको एक दिन अर्थात प्रत्येक  बुधबार जातीय मौलिक पहिचान झल्किने पोसाक लगाउनुपर्ने गापाको निर्णयलाई विद्यालयहरुले कार्यान्वयन गरेका छन् ।

विद्यालयका शिक्षक, कर्मचारी, विद्यालय नर्स र विद्यार्थीले प्रत्येक साताको बुधबार आ–आफ्नो जातीय पहिचान अनुसारको पोसाक लगाउन सुरु गरेका गाउँपालिका अध्यक्ष शिव अधिकारी अविरलले बताए । अध्यक्ष अधिकारीका अनुसार सबै  जातजातिको पहिचान र संस्कृतिको संरक्षणका लागि गाउँपालिकाले अभियानका रुपमा परम्परागत जातीय पोसाकको संरक्षणअन्तर्गत सातामा एक दिन बुधबार जातीय पहिचानसहितको पोसाक अनिवार्य गरिएको छ ।

'जातीय पहिचानमा सजिएर विद्यालय जान पाउँदा विद्यार्थीहरु उत्साहित देखिएका छन्,' अध्यक्ष अधिकारीले अगाडि भने, 'मौलिक पोसाक लगाउन पाएसँगै विद्यार्थीमा विद्यालय र अध्ययनप्रतिको आकर्षण र संस्कृतिको संरक्षणमा टेवा पुग्ने विश्वास लिइएको छ ।'

गाउँपालिका शिक्षा समितिको बैठकको निर्णय र गत चैत ५ मा बसेको पालिकाभित्रका प्रधानाध्यापकहरुको संयुक्त बैठकले जातीय पहिचानसहितको मौलिक पोसाकलाई कार्यान्वयन गर्ने सहमति जनाएको थियो ।