वीरेन्द्रनगर नगरपालिका कर्णाली प्रदेशको राजधानी भएको नगरपालिका हो । यो विकासका पूर्वाधारका साथै अन्य मापदण्डका हिसावले उपमहानगर बनाउन तयार भइसकेको छ । चालू आर्थिक वर्षको नीति तथा कार्यक्रममा पनि हामीले यो विषयलाई प्रवेश गराएका थियौं ।
अहिले हामीले उपमहानगरपालिका बन्न आवश्यक मुख्य दुई मापदण्ड पूरा गरेको अवस्था छ । यहाँ जनसंख्या पनि पर्याप्त छ । राजस्व संकलनका दृष्टिले पनि राम्रो छ । वार्षिक २७ करोड चाहिनेमा यस वर्ष ४१ करोडको प्रक्षेपण गरिएको छ । झन् यो वर्षलाई राजस्व सुधारको वर्षका रूपमा लिएका छौं । राजस्वबाटै हामीले नगरको सबै चालु खर्च व्यवस्थापन गर्न सफल भएका छौं । वीरेन्द्रनगर आन्तरिक आयका हिसावले आत्मनिर्भर छ । संघ र प्रदेश सरकारले सकारात्मक सहयोग गरेको खण्डमा उपमहानगर घोषणाका लागि सबै मापदण्ड पूरा भइसकेको छ ।
कर्णाली प्रदेशभरि नै एउटा पनि उपमहानगर छैन । अन्य पालिका तत्काल उपमहानगर बन्न सक्ने अवस्थाका पनि छैनन् । तर, प्रदेश मुकामको वीरेन्द्रनगर नगरपालिका भने सबै हिसावले उपयुक्त छ ।
कर्णालीलाई सधैं रोग, भोक, अशिक्षा र विकटताले मात्र चिनाइयो । अब हामीले कर्णाली सुन्दर, विकसित र सम्भावनाको क्षेत्र हो भनेर पहिचान कायम गराउनु छ । त्यसका लागि प्रदेशको राजधानी राजनीतिक, आर्थिक तथा प्रशासनिक केन्द्रको रूपमा विकसित हुनु जरुरी छ । यहाँ पर्याप्त पूर्वाधार, सार्वजनिक सेवा प्रवाह, जनसंख्या सबै हिसावले वीरेन्द्रनगर अब्बल छ ।
अब वीरेन्द्रनगरलाई उपमहानगर घोषणा गरी संघ र प्रदेश सरकारले कर्णालीवासीलाई राजनीतिक तथा प्रशासनिक रूपमा थप सेवा सुविधा दिनुपर्छ । यो सवाल यहाँका नागरिकको अधिकारका रुपमा हामीले लिएका छौं । त्यसका लागि हामीले आवश्यक पहल पनि सुरु गरिसकेका छौं ।
(ढकाल वीरेन्द्रनगर नगरपालिका सुर्खेतकी मेयर हुन् ।)
प्रतिक्रिया दिनुहोस !
