सिन्धुली : मध्यपाहाडी लोकमार्ग अन्तर्गत सिन्धुलीको गोलन्जोर गाउँपालिका १ कुँडुलेमा पहिरो खस्दा एउटा ट्रक पुरिएको छ भने राजमार्ग पूर्ण रूपमा अवरुद्ध भएको छ ।
जिल्ला प्रहरी कार्यालय सिन्धुलीका प्रमुख गोविन्दाराज काफ्लेका अनुसार बुधवार बिहान सडक माथिबाट लेदोसहित खसेको पहिरोले प्रदेश २ –०३–००१ ख– ७१४४ नम्बरको ट्रक पुरिएको हो ।
पहिरोमा ट्रक चालक पर्सा परवानीपुरका वर्ष २५ का रोशन पटेल भने सकुशल रहेका छन् । लगातारको वर्षापछि खसेको पहिरोका कारण मध्यपहाडी लोकमार्गको खुर्कोट–घुर्मी खण्डको कुँडुलेमा लेदोसहितको पहिरो खस्दा पुरिएको ट्रक निकाल्न पहिरो पन्छाउने काम सुरु गरिएको काफ्लेको भनाइ छ । पहिरोका कारण दुईतर्फी यातायात अवरुद्ध भएको छ ।
मध्य पहाडी लोकमार्ग अन्तर्गत गोलन्जोर गाउँपालिका ६ अक्करेभिर, वडा नम्बर ३ को काली आँप डाँडा, फिक्कल गाउँपालिका २ सुम्नामबेसीमा समेत पहिरो खस्दा सडक अवरुद्ध भएको छ ।
यातायात अवरुद्ध हुँदा पूर्वी पहाडी जिल्ला ओखलढुङ्गा, खोटाङ, सोलुखुम्बु, भोजपुर, उदयपुरबाट काठमाडौं आवतजावत गर्ने सवारी साधन बीच बाटोमै अलपत्र परेका छन् । अवरुद्ध राजमार्ग खुलाउन यान्त्रिक कार्यालय मूलकोट र गोलन्जोर गाउँपालिकाको सहयोगमा एक्स्काभेटर मगाएर पहिरो पन्छाउने काम सुरु गरिएको छ ।
प्रतिक्रिया दिनुहोस !
