'अलबिदा' लेखेर बेपत्ता भए महेन्द्र क्याम्पसका उपप्राध्यापक डा. तिम्सिना

धरान  : महेन्द्र क्याम्पस धरानका उपप्रध्यापक डा. रामजी तिम्सिना बेपत्ता भएका छन् । उनी बुधबार बिहानदेखि बेपत्ता भएका हुन् । उनको खोजि भइरहेको सुनसरीका प्रहरी प्रमुख एसपी बीपीन रेग्मीले बताए । डा. तिम्सिनाले ‘म बराहक्षेत्रमा जलसमाधि लिँदैछु । अलबिदा ' लेखेको नोट फेला परेपछि सप्तकोसी आसपासको क्षेत्रमा प्रहरी परिचालन गरिएको एसपी रेग्मीले बताए 

उक्त नोटमा मिति २०८१।०३।१९ बुधबार बिहान ४:१८ बजे उल्लेख गरेको छ।  उनी बिहान ४ बजेर १८ मिनेटमा नोट लेखेर बेपत्ता भएको हुनसक्ने प्रहरीको प्रारम्भिक अनुमान छ।

तिम्सिनाकी श्रीमती कान्छी छोरी लिएर अलग्गै बस्न थालेपछि उनी आपगाछीको आफ्नो घरमा आमासँगै बस्दै आएका थिए । श्रीमती अलग बस्न थालेपछि तिम्सिना मानसिकरुपमा विक्षिप्त बनेको स्थानीय बासिन्दाको भनाइ छ।

तिम्सिना धरानस्थित महेन्द्र बहुमुखी क्याम्पस र इटहरीको कोसी कलेजमा प्राध्यापकको रुपमा कार्यरत थिए ।  समालोचनामा रूची राख्नने उनी  पूर्वमा भएका विभिन्न साहित्यिक कार्यक्रमहरूमा सक्रिय रूपमा सहभागी जनाउँदै आएका थिए ।

तिम्सिना बेपत्ता भएपछि सिङ्गो क्याम्पस परिवार चिन्तित बनेको महेन्द्र क्याम्पसका क्याम्पस प्रमुख चन्द्र राईले बताए। तिम्सिनाका शुभचिन्तकहरू चिन्ता प्रकट गर्दै  खोजिका लागि प्रहरीसमक्ष अनुरोध गरेका छन् ।