धरान : सप्तकोसी नदीले बगाएर सुनसरी बराहक्षेत्र नगरपालिका-३ कि १८ वर्षीया मनिषा नेपाली बेपत्ता भएकी छन्। आइतबार बेलुका बराहक्षेत्र-६ को बोराबाधमा साथीहरू संग घुम्न गएकी उनी सप्तकोसीले बगाएर बेपत्ता भएको जिल्ला प्रहरी कार्यालय सुनसरीका प्रवक्ता डीएसपी नबिनकृष्ण भण्डारीले बताए।
सप्तकोसी किनारमा घुम्न गएकी मनिषाको सप्तकोसीको किनारमा हात मुख धुने क्रममा नदीले बगाएर बेपत्ता भएको डीएसपी भण्डारीले बताए। उनी कोसीमा बेपत्ता भए लगत्तै नेपाल प्रहरी र सशस्त्र प्रहरीको तालिम प्राप्त टोलीले खोजी कार्य गरेको भए पनि उनलाई फेला पार्न नसकिएको भण्डारीले बताए।
स्थानीय प्रशासनले बाढी आएको समयमा सप्तकोसीमा माछा मार्न, दाउरा खोज्न र ढुंगा चलाउन रोक लगाएको भए पनि स्थानीयले जबरजस्ती गरी दाउरा खोज्ने र कोशी आसपासमा घुम्न जाने गरिरहेका छन्।
प्रतिक्रिया दिनुहोस !
४
