हेटौंडा : बागमती प्रदेशमा हालसम्म ७० प्रतिशत रोपाइँ भएको छ। प्रदेशको १३ जिल्लाको कुल १ लाख १४ हजार ५ सय ६१ हेक्टर धानखेतीका लागि योग्य जमिनमध्ये साउन १ गतेसम्ममा जम्मा ७९ हजार २ सय ५७ हेक्टर क्षेत्रफलमा मात्रै रोपाइँ भएको हो।
हालसम्म प्रदेशको दोलखामा सबैभन्दा बढी रोपाइँँ भएको छ। दोलखामा हालसम्म २ हजार ४ सय ७६ हेक्टर अर्थात् ८८ प्रतिशत रोपाइँ भएको कृषि तथा पशुपन्छी विकास मन्त्रालय हेटौंडाले जनाएको छ।
त्यस्तै, धादिङ जिल्लामा सबैभन्दा कम रोपाइँ भएको मन्त्रालयको तथ्यांकमा उल्लेख छ। धादिङमा ११ हजार ३ सय हेक्टर जमिनमध्ये ६ हजार ४६ हेक्टरमा मात्रै रोपाइँ सकिएको हो।
मन्त्रालयका सूचना अधिकारी अनुप अधिकारीका अनुसार काठमाडौं जिल्लामा ५ हजार ९ सय २६ हेक्टर जमिनमध्ये ८५ प्रतिशत अर्थात् ५ हजार ३७ हेक्टर क्षेत्रफलमा, भक्तपुरमा ३ हजार ७ सय १९ हेक्टरमा ७३ प्रतिशत अर्थात् २ हजार ७ सय १५ हेक्टर, २४ हजार २ सय ४७ हेक्टर क्षेत्रफलमा रोपाइँ हुने गरेको चितवनमा ७८ प्रतिशत अर्थात् जम्मा १८ हजार ८ सय ७८ हेक्टरमा रोपाइँ भएको हो।
बागमती प्रदेशको राजधानीसमेत रहेको मकवानपुरमा ९ हजार ४ सय ५० हेक्टर जमिनमध्ये ७८ प्रतिशत अर्थात् ५ हजार ८ सय ५९ हेक्टर क्षेत्रफलमा र नुवाकोटमा ११ हजार ६ सय १२ हेक्टर जमिनमध्ये ६७ प्रतिशत अर्थात् ७ हजार ७ सय ५८ हेक्टर जमिनमा धान रोपाइँ भएको हो।
सिन्धुलीमा ११ हजार १ सय ८८ हेक्टर जमिनमध्ये ७२ प्रतिशत अर्थात् ८ हजार ५६ हेक्टर जमिनमा, रामेछापमा ७ हजार ८ सय ५९ हेक्टर जमिनमध्ये ६६ प्रतिशत अर्थात् ५ हजार १ सय ८७ हेक्टर जमिनमा, काभ्रेपलाञ्चोकमा १० हजार १ सय ८ हेक्टर जमिनमध्ये ७४ प्रतिशत अर्थात् ७ हजार ४ सय ३३ हेक्टर जमिनमा रोपाइँ भएको हो।
त्यस्तै, प्रदेशको रसुवामा १ हजार ९३ हेक्टर क्षेत्रफलमा धान रोपाइँ हुने गरेकोमा यो वर्ष ७ सय ८३ हेक्टर अर्थात् ७२ प्रतिशत जमिनमा, सिन्धुपाल्चोकमा ८ हजार ७ सय ८२ हेक्टर जमिनमध्ये ६५ प्रतिशत अर्थात् ५ हजार ७ सय हेक्टर जमिनमा धान रोपाइँ सकिएको मन्त्रालयले जनाएको छ।
प्रतिक्रिया दिनुहोस !
