काठमाडौं : हाल देशभर मनसुनी वायुको प्रभाव रहेको छ। आज बिहान बागमती र गण्डकी प्रदेशका धेरै स्थानहरूमा तथा कोशी, लुम्बिनी र कर्णाली प्रदेशका थोरै स्थानहरूमा वर्षा भइरहेको मौसम पूर्वानुमान महाशाखाले जनाएको छ।
आज दिउँसो कोशी प्रदेश लगायत बागमती, गण्डकी, कर्णाली र सुदूरपश्चिम प्रदेशका पहाडी भू-भागका केही स्थानहरूमा तथा बाँकी भू-भागका थोरै स्थानहरूमा मेघ गर्जन/चट्याङ्ग सहित हल्कादेखि मध्यम वर्षा हुने महाशाखाको बुलेटिनमा उल्लेख छ।
त्यस्तै आज राती पनि लुम्बिनी र कर्णाली प्रदेशका थोरै स्थानहरू तथा बाँकी प्रदेशका केही स्थानहरूमा मध्यम वर्षा र कोशी, बागमती, गण्डकी र सुदूरपश्चिम प्रदेशका एक-दुई ठाउँमा धेरै भारी वर्षा हुन सक्ने महाशाखाले उल्लेख गरेको छ।
मधेशका केही स्थानमा भोलिबाट वर्षा हुने
भोलि अर्थात सोमबार मधेश र लुम्बिनी प्रदेशका थोरै स्थानहरूमा मध्यम वर्षा हुने छ। भोलि राती भने कोशी, मधेश, बागमती र गण्डकी प्रदेशका एक-दुई स्थानमा धेरै भारी वर्षा हुने सम्भावना रहेको बुलेटिनमा जनाइएको छ ।
मंगलबार पनि सबै प्रदेशका केही स्थानहरूमा मेघ गर्जन/चट्याङ्गसहित मध्यम वर्षा हुने र कोशी, मधेश, बागमती, गण्डकी, लुम्बिनी र सुदुरपश्चिम प्रदेशका एक-दुई स्थानमा भारी वर्षा हुने छ।
आज राती कोशी, बागमती, गण्डकी र सुदूरपश्चिम प्रदेशका केही ठाउँमा भारी वर्षा हुने भएकोले त्यसबाट निम्तिन सक्ने जोखिमबाट सचेत रहन महाशाखाले सबैमा अनुरोध गरेको छ।