काठमाडौं : गृहमन्त्री रमेश लेखक र नेपालका लागि स्वीस राजदूत डा. डेनिएल मेउलीबीच भेटवार्ता भएको छ। सोमबार गृह मन्त्रालयमा भएको भेटमा गृहमन्त्री लेखकले नेपाल र स्वीट्जरल्याण्डबीच सन् १९५६ देखि बलियो द्विपक्षीय सम्बन्ध रहेको बताए।
स्वीस राष्ट्रपतिसँग द्विपक्षीय भेटका लागि गत जेठ २९ मा नेपालका राष्ट्रपति रामचन्द्र पौडेलले गरेको स्वीट्जरल्याण्डको भ्रमणले दुई देशबीचको सम्बन्धलाई थप मजबुत बनाएको उनको भनाइ छ। भौगोलिक दूरी र फरक विकास स्तरका बावजुद दुवै देशले मित्रता, सहयोग र पारस्परिक सम्मानलाई कायम गरेको भन्दै नेपालको शान्ति प्रक्रियामा स्वीसले गरेको सहयोगको गृहमन्त्री लेखकले प्रशंसा गरेका थिए।
'विकास र सहयोगका लागि स्वीस एजेन्सीले नेपालको सामाजिक आर्थिक विकासमा उल्लेख्य योगदान गरेको छ। आगामी दिनहरूमा विपद् व्यवस्थापन र जलवायु परिवर्तनको क्षेत्रमा सहायता उपलब्ध हुने विश्वास लिएको छु,’ उनले भने। गृहमन्त्री लेखकले सन् २०२६ सम्ममा नेपाल न्यून आय भएको मुलुकबाट स्तरोन्नति भइ २०३० सम्ममा मध्यम आय भएको मुलुक बन्ने लक्ष्य प्राप्तिको लागि स्रोत, साझेदारी र प्रविधिमा स्विट्जरल्यान्डसँग सहयोगको अपेक्षा गरेका थिए।
‘नेपालले विकास सहयोग र प्रत्यक्ष वैदेशिक लगानीमा स्वीस सरकारसँग सहयोगको अपेक्षा गर्दछ। जलवायु परिवर्तन नेपालको लागि महत्त्वपूर्ण मुद्दा भएकाले सिओपी-२८ जस्ता विश्वव्यापी मञ्चहरूमा नेपालले उठाउँदै आएको पर्वतीय मुद्दालाई समर्थन गर्न स्वीस सरकारसमक्ष आग्रह गर्दछ,’ उनको भनाइ थियो।
राजदूत मेउलीले नेपालको संक्रमणकालीन न्यायका विषयमा चासो व्यक्त गरेकी थिइन्। उनले संक्रमणकालीन न्यायको विषय कार्यान्वयनका लागि स्वीट्जरल्याण्डको सहयोग रहने बताएकी थिइन्।
प्रतिक्रिया दिनुहोस !
