भोजपुर : अविरल वर्षासँगै उत्तरी ईर्खुवा खोलामा आएको बाढीले बगाउँदा एक जनाको मृत्यु भएको छ । अर्का एकजना भने बेपत्ता छन् । उत्तरी साल्पासिलिछो गाउँपालिका-४ गोथेबजारस्थित मंगलबार राति आएको बाढीमा परी हाइड्रोपावरका कामदार बर्दियाको बारबर्दिया नगरपालिका-५ का रमेश थारुको मृत्यु भएको हो ।
बाढीले निर्माणाधीन ४ दशमलव ३ मेगावाटको फेदी थुलुङ खोला र १४ दशमलव ५ मेगावाटको अप्पर इर्खुवा खोलाको जलविद्युत्त गृहमा ठूलो क्षति पुर्याएको छ। बाढीले उक्त इर्खुवा खोला जलविद्युत आयोजनाका चारजना कामदारहरूलाई बगाएको थियो ।
जसमा दुईजनाको सकुशल उद्धार गरिए पनि बाँकी दुईजनालाई खोलाले बगाएको थियो । मृत भेटिएका रमेशको शव षडानन्द नगरपालिका-६ सतिघाटस्थित अरुण नदीको किनारमा फेला परेको जिल्ला प्रहरी कार्यालय भोजपुरका प्रहरी निरीक्षक दिपक श्रेष्ठले जानकारी दिए ।
बेपत्ता भएका बर्दियाको बारबर्दिया गाउँपालिका- ३ का श्यामकुमार थारुको खोजी भइरहेको उनले बताए । लगातारको वर्षात्ले स्थानीय लम्खुवा,नागदह आसपासका बस्तीमा पनि क्षति पुगेको छ । नागदहका सीता राई र चित्रबहादुर दर्जीको घर बगाएको छ । सीता राईलाई पुरिएको अवस्थाबाट स्थानीयले उद्धार गरेको फेदीका स्थानीय मनि राईले बताए ।
बाढीले झोलुङ्गे पुल,सडकका पुलहरू र लघु जलविद्युतमा पनि क्षति पुगेको छ ।
प्रतिक्रिया दिनुहोस !
