देश चलाउन वैचारिक र सांगठनिक हिसाबले हकदार पार्टी एमाले हो : ओली

काठमाडौं : नेकपा एमालेका अध्यक्ष केपी शर्मा ओलीले एमाले देश चलाउन वैचारिक र सांगठनिक हिसाबले हकदार पार्टी भएको बताएका छन्। आज च्यासलमा एमालेका पदाधिकारी र केन्द्रीय सदस्यलाई सपथ ग्रहण गराएपछि उनले संघर्षको लामो इतिहास बोकेको पार्टी भएको बताएका हुन्। 

‘नेकपा एमाले एउटा बलिदानपूर्ण संघर्षको लामो इतिहास बोकेको पार्टी हो । ७५ वर्षको राजनीतिक आन्दोलनमा संलग्नता /सहभागिता मात्र होइन नेतृत्व गरेको पार्टी हो। कहिले वैचारिक, कहिले व्यवहारिक र सांगठनिक हिसाबले नेतृत्व गरेको पार्टी हो।’

ओलीले वैचारिक र दृष्टिकोणको हिसाबले स्थापनादेखि नै पार्टीले नेतृत्व गरिरहेको उनको भनाई छ। ओलीले भने,‘ वैचारिक स्पष्टता र सांगठनिक एकता, अनुशासित र गतिशील संगठन भएकाले मात्र हामीले हैसियत प्राप्त गर्न सक्छौं। अरुले कसैले मौका दिएन भन्ने कुरा होइन। राजनीतिमा अधिकार लडेर लिने हो। त्यो पनि पटक पटक लड्नुपर्छ। लोकतान्त्रिक र स्वस्थ प्रतिस्पर्धा हुनुपर्छ।’

ओलीले एमाले र संविधान संशोधनप्रति भ्रम फैलाउने कोसिस भइरहेको समेत बताए।