विराटनगर : विराटनगरमा निकालिएको राधाकृष्ण रथयात्राका क्रममा चोरी र पकेटमारीमा संलग्न तथा शंकास्पद गतिविधि गर्नेहरुलाई प्रहरीले नियन्त्रणमा लिएको छ ।
रथयात्राका क्रममा १ सय ४३ जनालाई प्रहरीले नियन्त्रणमा लिएको हो । प्रहरी नियन्त्रणमा रहेकामध्ये १० जना महिला छन् । मोरङ प्रहरी प्रमुख एसपी नवराज कार्कीले उच्छृङ्खल र शंकास्पद गतिविधि तथा चोरी र पकेटमारीमा संलग्नहरुलाई अनुसन्धानको दायरामा ल्याइएको जानकारी दिए ।
‘सबै जनालाई अहिले प्रहरीको नियन्त्रणमा राखिएको छ । थप कुरा बुझेपछि मात्रै कति जनालाई कानुनी कारबाहीको प्रक्रियामा लैजाने भन्ने टुंगो लाग्छ,’ उनले भने, ‘नियन्त्रणमा लिइएकामा केही भारतीय नागरिक पनि छन् । भीडभाडको मौका छोपेर चोरी तथा पकेटमारी गर्ने उद्धेश्यले उनीहरु विराटनगर आएको देखिन्छ ।’ प्रहरी नियन्त्रणमा रहेकाहरुका सम्बन्धमा थप कुरा बुझ्ने काम भइरहेको एसपी कार्कीले बताए ।
रथयात्रालाई लक्षित गरेर ठूलो संख्यामा नेपाल र सशस्त्र प्रहरी परिचालन गर्दै विराटनगरको सुरक्षा व्यवस्था कडा पारिएको थियो । सुरक्षा सक्रियताकै कारण रथयात्रा भव्य, सभ्य, सुरक्षित र मर्यादित भएको छ ।
एसपी कार्की रथयात्रा अवधिभर सादा पोसाक र हतियारसहितका प्रहरी परिचालन गरिएको बताउँछन् । सादा पोसाकमा मात्रै १३ वटा टोली परिचालन गरिएको उनले बताए । यात्राका क्रममा चोरी र पकेटमारीका छिटपुट घटना भने भएका छन् । भक्तजनले लगाएका गरगहना तथा बोकेका मोबाइल र पैसा चोरी भएको हो ।
सुरक्षा व्यवस्था चुस्त दुरुस्त बनाउँदै भक्तजनको सुरक्षामा ध्यान दिएका कारण रथयात्रामा ठूला घटना हुन नपाएको एसपी कार्की बताउँछन् । प्रहरीले केही दिन अघिदेखि नै शंकास्पद व्यक्तिहरु माथि निगरानी बढाएको थियो ।
ऐतिहासिक राधाकृष्ण रथयात्रा भव्य रूपमा सम्पन्न भएको छ । प्रत्येक वर्ष श्रीकृष्ण जन्माष्टमीको भोलिपल्ट निकालिने रथयात्रामा मंगलबार हजारौं भक्तजनको उपस्थिति रहयो । रथयात्राकै कारण विराटनगरमा मानवीय चहलपहल पनि अत्यधिक थियो । विराटनगर महानगरपालिका–१ स्थित राधाकृष्ण मन्दिर परिसरबाट राधाकृष्णको युगल जोडीसहितको रथ दिउँसो ३:३० बजेतिर निकालिएको हो । रथयात्राले बजार क्षेत्रको ९ किलोमिटर यात्रा पूरा गरेको थियो ।
रथयात्रा तीनपैन, मेनरोड, ट्राफिक चोक, रोडशेष चोक, महेन्द्रचोक, धरान रोड, बरगाछी हुँदै पुनः मन्दिर परिसरमा पुगेर साँझ समापन भएको छ । यात्राका क्रममा रथलाई ४३ स्थानमा विश्राम गराइएको थियो । रथयात्रा सकिएलगत्तै उत्सवका रूपमा आतसबाजी गरिएको छ ।
विराटनगरको रथयात्रालाई दक्षिण एसियाकै दोस्रो ठूलो रथयात्रा भएको दाबी गरिँदै आएको छ । यो विक्रम संवत १९८८ सालदेखि ‘खट’ यात्राबाट प्रारम्भ भएको थियो । २०२५ सालबाट खटसँगै रथयात्रा निकाल्न थालिएको हो । पछिल्लो रथयात्रा खटको ९३ औं र रथको ५६ औं संस्करण हो । रथयात्रालाई लक्षित गरेर कोशी प्रदेश सरकारले सार्वजनिक बिदा दिएको थियो ।
राधाकृष्ण रथयात्रा हेर्न पूर्वी नेपालसहित छिमेकी मुलुक भारतका विभिन्न स्थानबाट हजारौं भक्तजन आएको रथयात्रा समारोह समितिले जनाएको छ । करिब ५ लाख भक्तजनले रथयात्राको प्रत्यक्ष अवलोकन गरेको दाबी समितिको छ । रथको डोरी छोयो भने मोक्ष प्राप्त हुने र मनोकामना पूरा हुने जनविश्वास छ ।
प्रतिक्रिया दिनुहोस !
