लक्ष्यअनुसार अगाडि बढौं, हामीलाई काम ढिलो गर्ने र विश्राम लिने सुविधा छैन : प्रधानमन्त्री ओली

काठमाडौं : प्रधानमन्त्री केपी शर्मा ओलीले कार्यसम्पादन सम्झौताअनुसार अगाडि बढ्न मन्त्री र कर्मचारीलाई निर्देशन दिएका छन्। प्रधानमन्त्री तथा मन्त्री परिषद्को कार्यालय सिंहदरबार आज  उपप्रधानमन्त्री र मन्त्रीहरूसँग कार्य सम्पादन सम्झौतापछि ओलीले देशप्रति जिम्मेवार भएर अगाडि बढ्न निर्देशन दिएका हुन्।

‘कति अवधिभित्र, कुन-कुन मन्त्रालयले कति काम गरिसक्ने, हामीले गन्तव्य तोकेका छौं। कार्ययोजना तोकेका छौं। हामीले लक्ष्य निर्धारण गरेका छौं। मन्त्री र मुख्यसचिवको कार्य सम्पादन सम्झौता भएको छ।’ ओलीले भने,‘ठोस कामको ठोस प्रतिबद्धता गरेका छौं। टीम स्प्रिटमा काम गर्छौं। एक अर्कालाई सहयोग गर्छौं। देश र जनताप्रति जिम्मेवार भएर काम गर्छौं।’

ओलीले के गर्छौं भन्ने थाहा नभएसम्म अगाडि बढ्न नसकिने भएकाले लक्ष्य निर्धारण गरेर काम गर्ने सहमति भएको बताए। ‘हामी कामलाई तिव्रता दिनेछौं। हामीसँग ढिलो गर्ने र अलमल गर्ने सुविधा छैन, विश्राम  लिने सुविधा छैन।’ 

ओलीले एक अर्को मन्त्रालयको काम र खर्चको डुब्लिकेशन हुनु नहुने नबनोस् भन्ने विषयमा ध्यान दिन आग्रह गरे। ओलीले समन्वयनात्मक ढंगले काम गर्न मन्त्री र मन्त्रालयहरुलाई निर्देशनसमेत दिए। उनले कार्यसम्पादन सम्झौता अनुसार अगाडि बढ्न सबैलाई निर्देशन दिए।