जीबी राई,रवि लामिछानेलगायतलाई दोषी ठहर गर्दै छानविन समितिले आज प्रतिवेदन बुझाउँदै

काठमाडौं : सहकारी संस्था बचत रकम दुरुपयोग सम्बन्धमा गठित संसदीय छानविन विशेष समितिले आज अन्तिम प्रतिवेदन बुझाउँदैछ । दिउँसो १ बजे बस्ने संसद् बैठकमा समितिले प्रतिवेदन बुझाउने कार्यसूची छ । नागरिकको बचत सहकारीहरूले हिनामिना गरेको भन्दै लामो समयदेखि संसद् अवरुद्ध भएपछि २०८१ जेठ १५ गते संसदीय छानविन विशेष समिति गठन गरिएको थियो । 

भदौ २२ गतेसम्म समितिलाई प्रतिवेदन बुझाउने समयसीमा तोकिए पनि प्रतिवेदन लेखन नसकिएपछि थप १५ दिन समय थपिएको हो । थपिएको १५ दिनको समयसीमा यही असोज ६ गते पूरा हुँदैछ । तर,छानविन विशेष समितिले ६ दिन अगाडि नै संसद्मा अन्तिम प्रतिवेदन बुझाउन लागेको हो । 

अन्तिम प्रतिवेदन तयार गर्नका लागि समितिले रातदिन काम गरिरहेको छ । यस अवधिमा समितिले ६५ वटा भन्दा बढी औपचारिक बैठक सम्पन्न गरेको समितिका सभापति सूर्य थापाले जानकारी दिए । समितिको औपचारिकरुपमा अन्तिम बैठक अहिले संघीय संसद् सचिवालयमा बसिरहेको छ । यही बैठकले अन्तिम प्रतिवेदनलाई पूर्णता दिने निर्णय गर्नेछ।

स्रोतका अनुसार समितिको प्रतिवेदनले गोर्खा मिडिया नेटवर्क अध्यक्ष जितेन्द्रबाबु (जीबी) राई,तत्कालिन प्रबन्ध निर्देशक रवि लामिछाने र सञ्चालक छविलाल जोशीलगायतलाई दोषी ठहर गरेको छ । पूर्वउपप्रधान एवं गृहमन्त्री र रास्वपाका सभापति लामिछानेले समितिमा दिएको जवाफ र छानविन विशेष समितिले गरेको अध्ययन प्रतिवेदनबीच तालमेल मिलेको नदेखिएको स्रोतले बताएको छ । बचत हिनामिना गर्ने विभिन्न २९ वटा सहकारीमाथि समितिले छानविन गरेको छ । समितिले अन्य विभिन्न सहकारीका बचत रकम अपचलन गर्नेहरूलाई तत्काल पक्राउ गरी अनुसन्धान अगाडि बढाउन सिफारिससमेत गरेको छ।

विभिन्न सहकारीका अध्यक्ष, सञ्चालक,प्रबन्ध निर्देशक गरी २४ जना फरार छन् । समितिले लिखितरुपमै गृहमन्त्रीलाई फरार भएकाहरूलाई झिकाउन निर्देशन दिएपनि समितिको अन्तिम प्रतिवेदन तयार हुँदासमेत उनीहरू पक्राउ परेनन् । 

सरकारले सहकारीको रकम अपचनलबारे अनुसन्धान गर्न सात सदस्यीय छानविन समिति गठन गरेको थियो। समितिमा सभापति थापासहित सरिता भुसाल, दिलेन्द्रप्रसाद बडू, ईश्वरी न्यौपाने, लेखनाथ दाहाल, शिशिर खनाल र ध्रुवबहादुर प्रधान सदस्य छन् ।