जोमसोम : मुस्ताङको घरपझोङ गाउँपालिका-२ मार्फा स्थित शीतोष्ण बागवानी विकास केन्द्र मार्फाले जिल्लाका उत्कृष्ट कृषक तथा समाजसेवीलाई सम्मान गरेको छ।
केन्द्रको ५८ औं स्थापना दिवसका अवसरमा मुस्ताङको लोघेकर दामोदरकुण्ड-१, चराङका कृषक टै ढिन्डुक ठकुरी र घरपझोङ-२ मार्फाका बिष्णुराज हिराचन सम्मानित भएका हुन्।
सरकारी स्वामित्वमा रहेको मार्फास्थित शीतोष्ण बागवानी विकास केन्द्रले कृषि फलफूल तथा तरकारी बालीको विकासमा महत्वपूर्ण योगदान पुर्याएको भन्दै लोघेकर -१ चराङ स्थित लुम्बिनी कृषि तथा पशुपछी पालन फार्मका सफल कृषक एवं वडाध्यक्ष टै ढिन्डुक ठकुरीलाई केन्द्रले नगद ५ हजार पुरस्कारसहित दोसल्ला ओढाएर प्रमाणपत्रले सम्मान गरेको हो।
केन्द्रको स्थापना कालदेखि वर्तमानकालसम्म निरन्तर अभिभावकीय एवं रचनात्मक तथा सृजनात्मक सहयोग पुर्याएको भन्दै घरपझोङ-२ मार्फाका समाजसेवी एवं पूर्व जिवस सभापति विष्णराज हिराचनलाई केन्द्रले दोसल्ला ओढाएर सम्मान गरेको हो।
केन्द्रले उत्कृष्ट कार्यसम्पादन तथा प्रशंनीय सेवा पुर्याएको उल्लेख गर्दै आफ्ना २ जना महिला कर्मचारीलाई दोसल्ला र प्रमाणपत्रले सम्मान गरेको छ।
प्रतिक्रिया दिनुहोस !
