काठमाडौं : भारतको केन्द्र शासित जम्मु-कश्मिरमा नेशनल कन्फ्रेन्स र कांग्रेस गठबन्धनले बहुमत ल्याएको छ। विधानसभा निर्वाचनको अन्तिम मतपरिणामअनुसार उक्त गठबन्धनले ४८ सिट जितेको छ। भारतीय निर्वाचन आयोगका अनुसार नेशनल कन्फ्रेन्सले ४२ सिट र कांग्रेसले ६ सिट जितेका हुन्।
त्यस्तै भारतीय जनता पार्टीले २९ सिटमात्र जित्दा पीडीपीले ३ सिटमा विजयी बन्यो। त्यस्तै सीपीएम, जेपीसी र आम आदमी पार्टीले एक-एक सिट जिते। आयोगका अनुसार ७ जना स्वतन्त्र उम्मेदवार विजयी भए। ९० सिटका लागि भएको निर्वाचनमा नेशनल कन्फ्रेस र कांग्रेसले सरकार बनाउने भएको छ।
जम्मु काश्मिरमा दस वर्षपछि विधानसभा निर्वाचन भएको हो। यसअघि भारतीय जनता पार्टी र पीडीपीले संयुक्त सरकार गठन गरेको थियो। उक्त सरकार ५ वर्ष नपुग्दै केन्द्रीय सरकारले सन् २०१९ मा आर्टिक ३७० लाई खारेज गरिदिएको थियो। सोही बेलादेखि जम्मु काश्मिरलाई केन्द्र सरकारले शासन चलाउँदै आएको थियो।
प्रतिक्रिया दिनुहोस !
