चितवन : खर्च अभावले दशैं मान्न पिरालोले सताइरहेका राप्तीका चेपाङले खाद्यान्न सहयोग पाएका छन् । आर्थिक अभावले दशैंमा चामल किन्न नसकेका विपन्न परिवारलाई चामल लगायत खाद्यान्न सहयोग जुटेको होा । उनीहरूका बारेमा अन्नपूर्ण पोष्टमा समाचार प्रकाशित भएपछि दाताले सहयोग गरेका हुन् ।
चामल किन्न नसकेपछि ढिंडो खाएर दशैं मनाउने सुरु गरेका राप्ती नगरपालिका १२ वाक्राङका विपन्न परिवारले सहयोग पाएपछि खुसी भएका छन् । दशैं ढुक्कले मनाउन पाएको भन्दै अमृतलाल चेपाङ खुसी देखिए । केही दिनअघि चामल नहुँदा पिर मानेका अमृतलाल परिवारसहित चामल बोकेर फर्किए । छोरीले चामलको भात खाने रहर गरेपछि उनी चिन्तित थिए । श्रीमती दिलमाया , छोरी सृष्टि सहयोग पाएपछि खुसी थिए । ‘ दशैंको मुखमा पाएको सहयोगले हाम्रो घरै उज्यालो भयो ,’अमृतलालले भने,‘अब ढिंडो खान नपर्ने भयो । ’
अन्नपूर्ण पोष्टको समाचार पढेर काठमाडौंका रोड सो रियल स्टेज प्रालिका अध्यक्ष कालु गुरुङले सात घरधुरीलाई चामल , नुन , तेल , मस्यौरा लगायतका सामाग्री हस्तान्तरण गरेका थिए। चितवन शाखाका प्रबन्धक जीवन तिवारीले गाउँमै पुगेर सहयोग वितरण गरे । ‘समाचारमा गरिब घरमा चामलको भात खाने रहर भएको देखेपछि नरमाइलो लाग्यो ,हामी त मनाउँछौं ती विपन्नले पनि दशैं मनाउन पाउन भनेर सहयोग गरेका हो ,’कालु गुरुङले भने ,‘दशैं भएकाले थोरै भएपनि सहयोग गरेका हौं। '
वाक्राङका चेपाङको बस्तीमा आर्थिक विपन्नताले दशैं खल्लो हुने समाचारले विकट बस्तीमा पुग्न पाएकोमा रोड सो रियल स्टेटका चितवनका शाखा प्रबन्धक जीवन तिवारीले खुसी व्यक्त गरे । ‘चाडपर्वमा खल्लो नहोस् भनेर हामी राहत लिएर गएका हौं ,’उनले भने ,‘भोलि पनि के गर्न सकिन्छ हामी सल्लाह गर्दैछौं । ’
समाचारकै प्रभावले पोखराको पालखे चोकका अशोक पालिखेले अमृतलाल चेपाङको परिवारलाई दश हजार नगद सहयोग गरे । पालिखेले समाचार पढेपछि यो परिवारलाई दशैंमा निराश हुन नदिन सहयोग गरेको बताए । उनी होटल म्यानेजमेन्ट कलेजका अध्यक्ष , फिस्टेल अस्पतालका निर्देशक , फिस्टेल नर्सिङ क्याम्पसका अध्यक्ष हुन् । ‘हामीले मात्रै मनाएर भएन गरिबको झुपडीमा पनि चुलो बलोस् भनेर सहयोग गरेको हो , ’उनले भने ,‘समाचारमा परिवारको पीडाले मन दुख्यो । हामीले थोरै सहयोग गर्दा कसैको परिवारमा खुसी आउँछ भने किन नगर्ने भनेर सहयोग गरेका हौं।'
प्रतिक्रिया दिनुहोस !
