चितवन : पूर्वबाट बग्दै आएको राप्ती र उत्तरी भेगबाट आएको नारायणीको संगमस्थल हो गोलाघाट । दुई नदीको मेल देखिने फराकिलो नदीको भाग र बीचको टापु । वारि मध्यवती वन र पारिपट्टी चितवन राष्ट्रिय निकुञ्जको हरियाली । साँझपख अस्ताउँदै गरेको सुनौलो रंग घाम,त्यही घामको छाँयाले सजिएर गोलाघाट ‘गोधूलि’ बन्छ । भरतपुर महानगरपालिका २८ स्थित गोलाघाटमा देखिने फराकिलो नदी , सुर्यास्तको लोभलाग्दो दृष्यले पर्यटकलाई लोभ्याउँछ ।
पहिलो पटक घुम्न पुगेका भरतपुर १० युनिक टोलका खुमनाथ पौडेल दंग परे । मनोरम दृष्यमा रमाएका उनले गोलाघाट रमणीय लागेको अनुभव सुनाए । ‘राप्ती र नारायणी नदी ,वातावरण सबैले धेरै राम्रो लाग्यो , ’ उनले भने ,‘यो पर्यटकीय ठाउँमध्यको पनि उत्कृष्ट लाग्यो । यो घुम्न जानपर्ने ठाउँ हो । ’
साँझपख गोलाघाट घुम्ने पर्यटक बढ्न थालेका छन् । नारायणी नदी किनारमा तटबन्ध गरेर ड्याम बनेको छ । ड्यामले पर्यटकलाई गोालघाटको नदी किनारमा पुग्न सजिलो भएको छ । पहिला मध्यवर्तीको वनबाट जानुपर्ने भएकोले अलि जोखिम थियो । अहिले बाढीले झाडी बगाएपछि खुल्ला भएको छ ।
पारिवारिक रुपमा घुम्नेको उत्तिकै भिड लागेको छ । ड्याममा रमाउँदै सुर्यास्त हेर्नेको भीड लाग्छ । पूर्वि चितवनको खोलेसिमलबाट पुगेका पुरुषोत्तम कंडेलले सुर्यास्त अवलोकनको मज्जाको लागि उत्तम थलो रहेको बताए । ‘यहाँ आउँदा आफै हराएको पाएँ । फराकिलो भएर बगेको नदी ,टाढासम्म देखिने सुर्यास्त साँच्चिकै मनमोहक छ ,’उनले भने ,‘यो ठाउँको प्रचार प्रसार गर्नुपर्छ । विदेशी त आएको देखियो । आन्तरिक पर्यटक पनि रमाउने यति रमाइलो ठाउँ मैले अन्यत्र देखिन । यो चितवनको सबैभन्दा उत्कृष्ट ठाउँ लाग्यो । ’
मेघौलीमा ठूला होटल बनेका छन् । शान्त र प्राकृतिक वातावरणमा रमाउन चाहने महंगा पर्यटक मेघौली बस्न मन पराउँछन् । ठूला होटलले साँझपख सुर्यास्तको बेला क्याम्प बनाउँछन् । खानाको स्वादमा सुर्यास्तको दृष्य हेरेर रमाउँछन् । विदाको समयमा आन्तरीक पर्यटकको भीड लाग्छ । दशैंको विदामा गोलाघाट पुग्ने आन्तरिक पर्यटक बढेका छन् । भरतपुर ५ तोरिखेतकी समिक्षा गौतमले परिवारसहित विदा मनाउन आएको बताइन् । ‘दशैंको विदा मनाएर आएको हुँ । प्राकृतिक मनोरम वातारण र सुर्यास्त हेरेर रमाइलो गर्यौं । ’
भरतपुर महानगरपालिकाले गोलाघाटको पर्यकीय विकासका लागि प्राथमिकतामा राखेको छ । महानगरले पर्यटक तान्नका लागि पूर्वाधारसहित प्रचार प्रसारमा लगानी गरेको छ । भरतपुर महानगरपालिकाका पर्यटन विज्ञ सल्लाहकार विश्व सुवेदीले महानगरले गोलाघाटको पहिचानसहितको पर्यटन विकासलाई प्राथमिकतामा राखेर विकास गरेको बताए । ‘गोलाघाट स्वर्ग नै हो । हामीले भनेर होइन यहाँ आएकाहरूको अनुभव हो । त्यसैले पनि पछिल्लो समय घुम्न आउनेहरू बढेका छन् ,’उनले भने,‘पर्यटनको विकास र आकर्षणका लागि महानगरको विविध योजना यहाँ परेको छ । पर्यटक भित्राउन हामी योजनावद्ध लागेका छौं । ’
नेपालको पर्यटनको सुरुवाति थलो मेघौली हो । २०२२ सालमा टाइगर टप्सको सञ्चालन भएसँगै पर्यटनको व्यवसायीक थालनी भएको मानिन्छ । यसैबेलादेखि नेपालमा वन्यजन्तुमा आधारित पर्यटन पनि सुरुवात भएको मानिन्छ । त्यसैको नजिक रहेको गोलाघाटले मेघौलीको पहिचान बनाएको छ । थारु र कुमाल जातीको संस्कृति पनि देखाउने गरिन्छ । गोालघाट भरतपुरको चौबिसकोडीबाट करिब ३५ किलोमिटर पश्चिममा पर्छ ।
प्रतिक्रिया दिनुहोस !
