मेला हेर्न गएका सोनारको शव बाराको गण्डक नहरमा भेटियो, अर्का बेपत्ता
कात्तिक १, २०८१ बिहीबार १३:३९:४६
सिमरा : मेला हेर्न भनेर आइतबार साँझ घरबाट निस्किएका वीरगन्जका एक पुरुषको शव बाराको फेटा गाउँपालिका- १ स्थित गण्डक नहरमा भेटिएको छ । वीरगन्ज महानगरपालिका- ३ छपकैयाका करिब २६ वर्षीय वीरेन्द्र साह सोनारको शव बिहीबार बिहान गण्डक नहरमा भेटिएको हो ।
नहर छेउमा हिँड्दै गरेका स्थानीयले शव देखेपछि प्रहरीलाई खबर गरेका थिए । घर नफर्किएको दिनदेखि उनको खोजी भइरहेको थियो । बाराका प्रहरी प्रवक्ता प्रकाश सापकोटाका अनुसार मुसर्वा मेला हेर्न भनेर वीरेन्द्र चार दिनअघि घरबाट निस्किएका थिए ।
उनीसँगै उनको घरमा बस्ने बिजय गुप्ता कलवार पनि गएका थिए । कलवार पनि सम्पर्कविहीन छन् । प्रहरी नायब उपरीक्षक एवम् प्रवक्ता सापकोटाले वीरेन्द्रसँगै गएका कलवार पनि हालसम्म सम्पर्कविहीन रहेको बताए । प्रवक्ता सापकोटाले घटनाको अनुसन्धान सुरु गरिएको जानकारी दिए ।
प्रतिक्रिया दिनुहोस !
