'दाना' आँधी आज बंगाल र ओडिशाको तटमा पुग्ने : तटीय क्षेत्रका तीन लाख मानिसलाई सुरक्षित स्थानमा सारियो
दुई सयभन्दा बढी रेलवे र १६ घन्टा उडान बन्द
कात्तिक ८, २०८१ बिहीबार ९:१६:२१
चक्रवाती आँधी 'दाना' आज पश्चिम बंगाल र ओडिशाको तटीय क्षेत्रमा पुग्न सक्ने जनाइएको छ। पश्चिम बंगाल र ओडिशाका सरकारले चक्रवात दानासँग लड्नका लागि तयारी पूरा भएको बताएको छ ।
'दाना' आँधीका कारण रेलवेले ‘वन्दे भारत’, राजधानी एक्सप्रेसलगायत दुई सयभन्दा बढी रेल सञ्चालनमा रोक लगाएको छ ।
सावधानीका रूपमा पश्चिम बंगाल र ओडिशाका सरकारले तटीय क्षेत्रबाट करिब तीन लाख मानिसलाई सुरक्षित स्थानमा सारिएको छ।
दुवै राज्यमा तटीय जिल्लाका सबै विद्यालय असोज २५ गतेसम्म बन्द गरिएको छ भने चिकित्सकसहित सबै सरकारी कर्मचारीको बिदा रद्द गरिएको छ ।
दाना आँधी बुधवार रातीदेखि बिहीबार बिहानसम्म पुरी र सागर द्वीपको बीचको तटमा पुग्न सक्ने जनाइएको छ। जसका कारण उक्त स्थानमा बिहीबार र शुक्रबार भारी वर्षाको सम्भावना रहेको छ ।
पश्चिम बङ्गालका मुख्यमन्त्री ममता बनर्जीले सम्भावित रूपमा दानाबाट प्रभावित जिल्लाहरूको अवस्थाको निगरानी गर्ने जिम्मेवारी सचिव-स्तरका अधिकारीहरूलाई सुम्पिएका बीबीसी समाचारमा उल्लेख छ।
उक्त क्षेत्रमा करिब एक हजार राहत शिविर खोलिएको छ । विद्यालय र सरकारी भवनमा जनताका लागि बास र खानाको व्यवस्था गरिएको छ ।
ओडिशाका राजस्व र प्रकोप व्यवस्थापन मन्त्री सुरेश पुजारीले पर्यटकहरूलाई आगामी चार दिनका लागि सबै होटल बुकिङ रद्द गर्न भनेका छन्। मङ्गलबार पुरीबाट तीन हजारभन्दा बढी पर्यटकलाई सकुशल घर पठाइएको उनले बताए । केहीलाई बुधबार बिहान पनि पठाइएको छ । अहिले पुरीका सबै होटल लगभग खाली छन् । बीबीसी
प्रतिक्रिया दिनुहोस !
