नुवाकोटमा ट्रक र मोटरसाइकल ठोक्किँदा एकजनाको मृत्यु, दुई घाइते
कात्तिक १६, २०८१ शुक्रबार १३:३:३८
नुवाकोट : नुवाकोटको पूर्वी भेगमा रहेको थानसिङमा सडक दुर्घटनामा परी एकजना युवकको ज्यान गएको छ भने दुईजना घाइते भएका छन् । लिखु गाउँपालिका- ६ दोबाटे थानसिङमा मिनी ट्रक र मोटरसाइकल ठोक्किएर दुर्घटना हुँदा एकजनाको मृत्यु र दुईजना घाइते भएको नुवाकोट प्रहरीले जनाएको छ। प्रहरीका अनुसार ट्रक चालक भने पक्राउ परेका छन् ।
ढिकुरेबाट छहरेतर्फ जाँदै गरेको बा ५ ख ७०१६ नं.को आइचर मिनिट्रक र बिपरीत दिशाबाट आइरहेको बा६२प २८७९ नं.को मोटरसाइकल ठक्कर खाँदा दुर्घटना भएको थियो। मोटरसाइकलको पछाडि सवार तादी गाउँपालिका ३ का ३६ वर्षीय बिनोद चौलागाईको ज्यान गएको जिल्ला प्रहरी कार्यालय नुवाकोटले जनाएको छ ।
मोटरसाइकल चालक तादी गाउँपालिका -३ का ३२ वर्षीय राजाराम श्रेष्ठ,मोटरसाइकलको पछाडि सवार तादी सोही गाउँपालिकाका ३ कै ३६ वर्षीय बिनोद चौलागाई र पैदलयात्री लिखु गाउँपालिका ५ का १८ वर्षीय प्रशान्त गोतामे गम्भीर घाइते भएका छन् ।
घाइतेलाई तत्काल उद्दार गरी काठमाडौं धापासीस्थित ग्रिनसिटी अस्पताल भर्ना गरिएको थियो। उपचारकै क्रममा चौलागाईको मृत्यु भएको एसपी शान्तिराज कोइरालाले जानकारी दिए । उनका अनुसार ठक्कर दिएको गाडी,गाडीका चालक ककनी गापा ८ को २९ विशालकुमार लामिछानेलाई नियन्त्रणमा लिइएको छ ।
प्रतिक्रिया दिनुहोस !
