रुकुमपूर्व : रुकुम पूर्वको महत गाउँमा गोरु जुधाई प्रतियोगिता सम्पन्न भएको छ। जिल्लाको भूमे गाउँपालिका वडा नम्बर ६ महत गाउँमा हरेक वर्षको लक्ष्मी पूजाको अवसरमा उक्त प्रतियोगिता सञ्चालन गरिन्छ।
गाउँखरदारी समितिको आयोजनमा सञ्चालन गरिएको साँढे गोरु जुधाई प्रतियोगितामा स्थानीय फर्क बहादुर सुनारको साँढे गोरु प्रथम भएको भुमे गाउँपालिका ६ महत गाउँका वर्तमान गाउँ मुखिया भरत बुढाले जानकारी दिए ।
प्रतियोगितामा रुजि सुनारको गोरु द्वितीय र धनप्रसाद बुढाको गोरु तृतीय भएको छ। गाउँका बलिया गोरुको छनोट गरेर यो प्रतियोगिता सञ्चालन गरिएको थियो । प्रतियोगितामा जम्मा १८ वटा साँढे गोरुबीच प्रतिस्पर्धा गराइएको अध्यक्ष बुढाले बताए ।
प्रतियोगितामा प्रथम, द्वितीय र तृतीय स्थान प्राप्त गर्न सफल साँढे गोरुका मालिकलाई क्रमशः ५ हजार, ३५ सय र २५ सय रुपैयाँ नगद पुरस्कार प्रदान गरिएको अध्यक्ष बुढाकाे भनाइ छ ।
वर्षाको सिजनमा लेक तिर उकालिएका साँढे गोरुलाई दशैं तिहारमा गाउँतिर झार्ने र वर्षायाममा कसले गोरुको राम्रो रेखदेख गर्यो भनेर थाहा पाउने उद्देश्यका साथ प्रतियोगिता सञ्चालन गर्ने चलन रहेको स्थानीय चेतन खाम मगरले बताए ।
प्रतियोगितामा प्रथम हुने साँढे गोरुका मालिकलाई आयोजकले पैसाको माला लगाई बाजा गाजासहित घरसम्म पुर्याउने र सोही टिम सहित स्थानीयहरु जम्मा भई नजिकैको चौतारामा गएर नाचगान गर्ने प्रचलन समेत छ । याे प्रचलन जिल्लाकाे भूमे गाउँपालिका वडा नम्बर ६ महत गाउँमा मात्रै रहेको छ ।
प्रतिक्रिया दिनुहोस !
